У Крамлі занепакоіліся з-за заявы Трампа пра Tomahawk для Украіны

• 7.10.2025, 14:09

Пяскоў працытаваў Пуціна.

Расія расцаніла б пастаўкі Злучанымі Штатамі Tomahawk Украіне як сур'ёзную эскалацыю, аднак у Крамлі спадзяюцца, што прэзідэнт ЗША Дональд Трамп жадае мірнага ўрэгулявання. Пра гэта заявіў прэс-сакратар расійскага дыктатара Уладзіміра Пуціна Дзмітрый Пяскоў. Яго заяву цытуюць расійскія медыя.

Ён падкрэсліў, што «важна дачакацца больш выразных заяў, калі яны будуць», і нагадаў, што Пуцін ужо выказваў пазіцыю з гэтай нагоды.

«Што датычыць пазіцыі Масквы, яна была даволі недвухсэнсоўна выкладзена прэзідэнтам Пуціным на нядаўняй сустрэчы ў рамках дыскусійнага клуба «Валдай». Там усё выразна было сказана: будзе сур'ёзны віток эскалацыі, які разам з тым не зможа змяніць становішча на фронце для кіеўскага рэжыму», — заявіў Пяскоў.

Таксама ён сказаў, што гаворка ідзе пра ракеты, «якія таксама могуць быць у ядзерным выкананні». Маўляў, гэта яшчэ адна прычына для верагоднай эскалацыі.