Названы спосаб падаўжыць маладосць

• 7.10.2025, 13:35

Дастаткова двух–трох умераных заняткаў на тыдзень.

Каб захоўваць здароўе з узростам, важна не толькі правільна харчавацца і больш рухацца, але і рэгулярна выконваць сілавыя практыкаванні. Даследаванні апошніх дзесяцігоддзяў паказваюць: сілавыя трэніроўкі — адзін з самых эфектыўных спосабаў запаволіць працэсы старэння і ўмацаваць арганізм, піша часопіс TIME (пераклад — сайт Charter97.org).

Сілавыя нагрузкі ўмацоўваюць косткі, папярэджваючы астэапароз і пераломы. «Кожнае прысяданне або адцісканне стварае мяккі ціск на шкілет, які стымулюе ўтварэнне новай касцяной тканіны», — тлумачыць фізіятэрапеўт Крыстэн Летэнбергер. Гэта асабліва важна для жанчын пасля 40 гадоў, калі з-за зніжэння ўзроўню эстрагену паскараецца страта касцяной масы.

Не менш важныя мышцы. Яны працуюць як «рухавік абмену рэчываў», спальваючы калорыі нават у спакоі. Паводле слоў лекара спартыўнай медыцыны Лорэн Бараўскі, пасля 40 гадоў пачынаецца натуральная страта мышачнай масы — саркапэнія, што запавольвае абмен рэчываў і павышае рызыку дыябету і метабалічнага сіндрому.

Сілавыя практыкаванні таксама паляпшаюць баланс і каардынацыю, зніжаючы рызыку падзенняў — галоўнай прычыны траўмаў у пажылых людзей. Яны ўмацоўваюць мышцы ног, спіны і тулава, дапамагаючы захоўваць устойлівасць і ўпэўненасць у рухах.

Акрамя таго, рэгулярныя трэніроўкі зніжаюць рызыку сардэчна-сасудзістых захворванняў, дыябету 2-га тыпу, дэменцыі і некаторых відаў раку. Дастаткова 2–3 умераных заняткаў на тыдзень, каб палепшыць абмен рэчываў, павысіць вытрываласць і ўмацаваць здароўе.

Як адзначае Летэнбергер, «мышцы — найлепшы падарунак, які вы можаце зрабіць сабе з узростам».