Axios: Краіны НАТА набудуць для Украіны ракеты Tomahawk

• 7.10.2025, 11:54

Ідзе пра боепрыпасы з далёкасцю палёту да 2500 км.

Амерыканскія ракеты Tomahawk для Украіны набудуць краіны НАТА. Пра гэта піша выданне Axios са спасылкай на інсайдэрскую інфармацыю.

Паводле дадзеных Axios, краіны Альянсу гатовыя выдзеліць грошы на куплю ў ЗША ракет Tomahawk для ЗСУ, калі прэзідэнт Дональд Трамп пагодзіцца іх прадаць. Колькі сродкаў могуць выдаткаваць на гэтае ўзбраенне, не ўдакладняецца.

У верасні гэтага года прэзідэнт Украіны Уладзімір Зяленскі заявіў, што ён папрасіў у Трампа новую сістэму ўзбраення, якая дапаможа прымусіць расійскага дыктатара Уладзіміра Пуціна скончыць вайну.

Пазней у СМІ з’явілася інфармацыя, што гаворка ідзе пра крылатыя ракеты Tomahawk, чыя далёкасць палёту складае да 2500 км.

Дональд Трамп 6 кастрычніка падчас зносін з журналістамі сказаў, што ўжо практычна прыняў рашэнне адносна паставак Украіне амерыканскіх ракет Tomahawk.

Але перш чым прыняць канчатковае рашэнне, ён хоча пачуць ад Украіны адказы на два пытанні. Трамп хоча ведаць, для якіх мэтаў Кіеў плануе выкарыстоўваць ракеты і куды менавіта яны будуць накіраваныя.

Расійскі дыктатар Уладзімір Пуцін заявіў, што калі Украіна сапраўды атрымае амерыканскія ракеты Tomahawk, гэта сур’ёзна пашкодзіць адносінам Расіі і ЗША.

Прэс-сакратар Крамля Дзмітрый Пяскоў паабяцаў, што Расія «належным чынам» адрэагуе на перадачу Украіне «Тамагавкаў».

Тактыка-тэхнічныя характарыстыкі ракет Tomahawk

Армія ЗША прыняла на ўзбраенне крылатыя ракеты Tomahawk у 1983 годзе. З таго часу іх неаднаразова мадэрнізавалі. Цяпер існуе некалькі варыянтаў «Тамагавкаў».

У 2017 годзе адна такая ракета каштавала прыблізна 1,9 млн долараў. Даўжыня Tomahawk - 5,55 м, дыяметр - 0,52 м, далёкасць палёту - 1 250-2 500 км, баявая частка - фугасная, ядзерная, касетная вагой да 454 кг.

Сістэмы навядзення - інерцыяльная сістэма з карэкцыяй па фота мясцовасці, GPS і супрацьрадарная ГСН. Ракета абсталявана турбарэактыўным рухавіком.