Z-блогер: Расійскі штурмавік жыве 12 дзён

• 6.10.2025, 11:30

Галоўная прычына гібелі акупантаў — украінскія дроны.

Z-прапагандыст Уладзімір Раманаў распавёў праўду пра незайздросны лёс расійскіх штурмавікоў. Сам ён адмаўляецца падпісваць кантракт з Мінабароны РФ.

Прапагандыст кажа, што калі падпіша кантракт, яго адразу адправяць у штурмавікі, хаця ён скончыў Ваенна-медыцынскую акадэмію па курсе «інструктар ваеннай медыцыны», а таксама мае навыкі працы з дронамі і поўны камплект асабістага рыштунку.

Ён з матэматычнай дакладнасцю падлічыў жыццёвы цыкл расійскага добраахвотніка ад дня падпісання кантракта да смерці. Гэта 12 дзён.

1 дзень: падпісвае кантракт і прыбывае на палігон;

2‑11 дзень: падрыхтоўка на палігоне;

12 (апошні) дзень: заліўка на пазіцыі.

«На гарачых участках — з двух байцоў да пазіцыі даходзіць адзін. У лепшым выпадку», — кажа Раманаў. Галоўная прычына гібелі расійскіх вайскоўцаў — украінскія дроны.