Што зменіцца для беларускіх аўтамабілістаў у лістападзе
- 31.10.2025, 22:40
Топ-8 важных змен.
Што прынясе аўтамабілістам апошні месяц восені – расказвае abw.by.
Заплаціць транспартны падатак да 17 лістапада
Галоўная навіна лістапада звязаная са сплатай маёмаснага плацяжу (зямельнага, транспартнага і падатку на нерухомасць). Сплаціць у гэтым годзе трэба да 17 лістапада.
Апошні месяц «пераабуцца» паводле новых ПДР
1 верасня змяніліся ПДР, а разам з імі і патрабаванні да шын узімку. Купляючы шыны, варта ўлічваць, што зімовыя шыны — гэта тыя, на маркіроўцы якіх адначасова прысутнічаюць два знакі, паведамілі ў ГУ ДАІ МУС:
- знак горнай вяршыні з трыма піккамі і сняжынкай унутры,
- адно з абазначэнняў M+S, M&S, MS.
Калі на маркіроўцы нанесеныя ГЭТЫ ДВА ЗНАКІ, такія шыны лічацца зімовымі ў любых дадатковых (+All Season; Road+Winter (R+W); Any Weather і інш.) варыяцыях.
Пры эксплуатацыі зімовыя шыны павінны мець астатнюю глыбіню малюнка пратэктара не менш як 4 мм.
Замяніць шыны трэба да 1 снежня. За ўдзел у дарожным руху на летніх або зношаных шынах узімку прадугледжана папярэджанне або штраф да 1 базавай велічыні (42 рублі), а пры паўторным на працягу года — ад 2 да 5 б.в. (84–210 рублёў). Калі такое парушэнне прывядзе да стварэння аварыйнай абстаноўкі або ДТЗ, то штраф будзе значна большы, магчымы і пазбаўленне правоў.
Новая аўтастаянка
1 лістапада ў Мінску адкрыюць новую аўтастаянку на 589 аўтамабіляў. Пра гэта паведаміла ДА «Гаражы, аўтастаянкі і паркоўкі». Новая аўтастаянка №25 знаходзіцца ў мікрараёне Лошыца на вуліцы Пташука, 8.
Тарыфы за месяц будуць такія: 49 рублёў за захоўванне легкавіка; за матацыкл без калыскі — 24,5 рубля; за ровар, электрасамакат — 12 рублёў. На захоўванне будуць прымаць і цяжкагрузы, аўтобусы, спецтэхніку.
Прайсці тэхагляд са зніжкай
6 лістапада на станцыях «Белтэхагляду» можна будзе прайсці ТО са зніжкай 50%. Прадпрыемства вырашыла паўтарыць акцыю «па шматлікіх просьбах».
Аплата банкаўскай карткай яшчэ на адным маршруце Мінска і безнаяўная аплата ў маршрутках
З 1 лістапада на аўтобусным маршруце №1 ДС «Вяснянка» — вакзал можна будзе аплаціць праезд банкаўскай карткай, пакуль у тэставым рэжыме. Да аплаты прымаюцца ўсе карты Беларусбанка, а таксама плацежнай сістэмы «Белкарт» усіх банкаў-рэзідэнтаў Беларусі. Аплаціць праезд можна і праз дадатак «Белкарт Pay».
Гэты маршрут — другі ў горадзе, дзе прымаецца безнаяўная аплата: месяц таму тэставую эксплуатацыю аплаты праезду банкаўскай карткай запусцілі на тралейбусным маршруце №1 «Зялёны Луг 6» — станцыя метро «Маскоўская». Пра тое, як кантралёры будуць правяраць аплату карткай, мы пісалі тут.
Таксама з 1 лістапада ва ўсіх гарадскіх маршрутных таксі павінна быць магчымасць аплаты праезду карткай або праз электронныя сэрвісы (напрыклад, E-POS, «Аплаці», SmartPay або Cashew).
На платных паркоўках — 15 хвілін бясплатна
Памятаеце, што цяпер на платных паркоўках першыя 15 хвілін бясплатныя? Гэтыя бясплатныя 15 хвілін адлічваюцца з моманту ўезду на паркоўку для пасадкі (высадкі) пасажыраў, пагрузкі (разгрузкі) тавараў. Рашэнне прыняў Мінгарвыканкам і яно ўступіла ў сілу з 29 кастрычніка.
У той жа час варта памятаць і пра іншую лічбу: 1 базавая велічыня (42 рублі) — памер платы ў выпадку неаплаты, несвоечасовай аплаты паркоўкі або ўнясення грошай не ў поўным аб'ёме.
Літоўская мяжа закрытая, два польскія пункты пропуску, верагодна, адкрыюць
Нагадаем, у лістападзе застаецца закрытай літоўская мяжа, пункты пропуску «Шальчінінкай» («Беняконі») і «Мядзіненкай» («Каменны Лог»). У найлепшым выпадку іх адкрыюць а 01:00 1 снежня. Пра гэта літоўскі бок праінфармаваў Дзяржпагранкамітэт Беларусі.
Але ёсць шанец, што ў сярэдзіне месяца Польшча можа адкрыць закрытыя «Баброўнікі» («Бераставіцу») і «Кузніцу» («Брузгі»). Заўважана, што агароджу ў той жа «Кузніцы» пачалі здымаць.
Латвія закрые ўезд нерэгулярным аўтобусам з Беларусі і Расіі
З 1 лістапада Латвія на год забараняе нерэгулярныя аўтобусныя перавозкі ў Беларусь і Расію. Забарона будзе дзейнічаць з 1 лістапада 2025 па 31 кастрычніка 2026 года. Рашэнне пра гэта на пачатку кастрычніка прыняў урад Латвіі.
Перавозчыкам забараняецца ажыццяўляць нерэгулярныя пасажырскія перавозкі аўтобусамі праз пункты пропуску «Патэрніекі» (з беларускага боку «Грыгораўшчына»), а таксама «Грэбнева» (з расійскага боку «Убылінка») і «Тэрэхава» («Бурачкі»). Забарона датычыцца ўсіх перавозчыкаў незалежна ад краіны рэгістрацыі транспартнага сродку і формы дзейнасці.
Забарона не датычыцца рэгулярных рэйсаў паміж Латвіяй і Беларуссю. Рэйсавыя аўтобусы працягнуць ездзіць у адпаведнасці з выдадзенымі дазволамі кампетэнтных органаў Латвіі і Беларусі.
Для турпаяздкаў у Еўропу з Беларусі на ўсю мяжу з ЕС пакуль што застанецца пункт пропуску «Брэст» на беларуска-польскай мяжы, дзе практычна заўсёды ёсць чарга аўтобусаў.
Пачнецца продаж зімовага дызельнага паліва
З 1 лістапада на ўсіх АЗС пачнуць прадаваць зімовае дызельнае паліва, яго беларускія НПЗ пачалі вырабляць з сярэдзіны кастрычніка.
Таксама НПЗ гатовыя выпускаць дызельнае паліва ДТ-3-К5 клас 2 (ужываецца ў перыяды, калі тэмпература навакольнага паветра складае мінус 20°C і ніжэй) па заяўках спажыўцоў.