У Японіі выпусцілі ваду, што спальвае тлушч

• 31.10.2025, 2:04

На першы погляд яна нічым не адрозніваецца ад звычайнай мінеральнай вады.

Японская кампанія выпусціла ваду, якая, паводле заяваў распрацоўшчыкаў, дапамагае паменшыць тлушч на жываце, піша Oddity Central.

Адзін з найбуйнейшых вытворцаў напояў у Японіі — Suntory — прадставіў новую «функцыянальную ваду», якая атрымала назву Special Water. На першы погляд яна нічым не адрозніваецца ад звычайнай мінеральнай вады — празрыстая, без смаку і не змяшчае калорый, цукру або кафеіну. Аднак прадукт афіцыйна зарэгістраваны ў краіне як «функцыянальная ежа», што азначае права вытворцы заяўляць пра карысць для здароўя, пацверджаную навуковымі даследаваннямі.

Галоўная асаблівасць Special Water — наяўнасць у складзе HMPA. Гэта нізкамалекулярны метабаліт, атрыманы з ферментаваных рысавых вотруб’яў. Згодна з данымі клінічных выпрабаванняў, рэгулярнае ўжыванне HMPA здольнае палепшыць размеркаванне абдамінальнага тлушчу ў людзей з павышаным індэксам масы цела, у прыватнасці — знізіць узровень вісцэральнага тлушчу, які лічыцца найбольш небяспечным для здароўя.

Special Water разлічана перадусім на офісных супрацоўнікаў і людзей з маларухомым ладам жыцця. Распрацоўшчыкі адзначаюць, што напой прызначаны для тых, хто хоча падтрымліваць здароўе, не змяняючы рэзка звыклы рытм жыцця. У Suntory заяўляюць, што пастаяннае ўжыванне вады можа дапамагчы ў барацьбе з лішняй вагой у вобласці жывата пры захаванні звыклага рацыёну.