Новы «Канкорд»: звышгукавы самалёт X-59 здзейсніў першы палёт

• 30.10.2025, 17:15

Ён можа даляцець з Лондана ў Нью-Ёрк за чатыры гадзіны.

У небе над Каліфорніяй упершыню ўзняўся ў паветра эксперыментальны самалёт X-59, распрацаваны NASA і Lockheed Martin. Тэставы палёт цягнуўся каля гадзіны і прайшоў «дакладна паводле плану», піша Daily Express (пераклад — сайт Charter97.org).

Аднамесны X-59 — унікальны звышгукавы самалёт, здольны лятаць хутчэй за гук, не ствараючы аглушальнага гукавога ўдару, які быў адной з галоўных праблем легендарнага «Канкорда».

Даўжыня самалёта — амаль 30 метраў, трэць з якіх прыпадае на завастрэны нос — менавіта ён дазваляе рассяваць ударныя хвалі і зніжаць шум. Замест гучнага «бабаха» X-59 стварае мяккі «гукавы шчоўк», параўнальны па гучнасці з гукам закрывання дзвярэй аўтамабіля.

Паводле разлікаў, X-59 зможа развіваць хуткасць да Маха 1,5 (каля 1 593 км/г) і ляцець на вышыні 17 кіламетраў. Гэта дазволіць скараціць час пералёту з Лондана ў Нью-Ёрк прыблізна да чатырох гадзін — на тры–чатыры гадзіны хутчэй, чым сучасныя пасажырскія лайнеры.

Падчас першага палёту самалёт рухаўся на дагукавай хуткасці — каля 370 км/г і дасягнуў вышыні 3,6 км. Хоць X-59 не прызначаны для перавозкі пасажыраў, атрыманыя даныя дапамогуць NASA вызначыць дапушчальныя ўзроўні шуму і адкрыць шлях да стварэння новага пакалення ціхіх звышгукавых авіялайнераў.