Літоўскі міністр культуры, які не адказаў на пытанне «Чый Крым», пайшоў у адстаўку

• 3.10.2025, 16:56

Ён прабыў на пасадзе ўсяго некалькі дзён.

Міністр культуры Літвы Ігнотас Адомавічус абвясціў пра свой сыход у адстаўку, прабыўшы на пасадзе крыху больш за тыдзень. Яго прызначэнне ад пачатку выклікала бурныя пратэсты ў краіне, да таго ж ён паспеў адзначыцца ў некалькіх скандалах, піша LRT.

Міністр культуры Літвы, прадстаўнік папулісцкай партыі «Заря Нямунаса», Ігнотас Адомавічус паведаміў, што сыходзіць з пасады, каб «не разбураць урад». Палітык таксама паскардзіўся на «ўзмоцнены ціск на мяне асабіста, на маю сям'ю, калі нам небяспечна знаходзіцца нават на вуліцы».

Да гэтага Адомавічус заявіў, што пытанні пра тое, каму належыць анэксаваны Расіяй Крым, з'яўляюцца правакацыйнымі.

«Гэта правакацыйныя пытанні, таму давайце нават не будзем да іх падыходзіць, бо тут мы ўвогуле не пра Міністэрства культуры гаворым», — сказаў Адомавічус парталу Lrytas, калі яго спыталі, чый Крым.

«Не, не будзем гуляць у гэтыя гульні. Разумееце, трэба быць… Тут ёсць мяжа, дзе трэба спыніцца. Тут трэба спыніцца. На гэтых пытаннях», — паўтарыў ён, калі яго перапыталі тое самае.

Праўда, як указвае Lrytas, пасля інтэрв'ю Адомавічус папрасіў адказаць на гэтае пытанне яшчэ раз:

«Гэта акупаваная тэрыторыя Украіны, якая цяпер знаходзіцца ў Расіі», — удакладніў міністр.

Кандыдатура 42-гадовага Адомавічуса ад самага пачатку выклікала моцнае незадаволенне культурнай супольнасці Літвы, бо ён не мае сувязяў з культурным сектарам. Да прызначэння міністрам ён нядоўга займаў пасаду дарадцы віцэ-спікера Сейма, а раней быў камерцыйным дырэктарам сямейнай кампаніі, якая вырабляе макароны.

Адомавічус уступіў на пасаду 25 верасня пасля прынясення прысягі ў Сейме. З таго часу, апроч размовы пра Крым, ён адзначыўся зняццем украінскага сцяга ў сваім міністэрстве і заявамі ў сацсетках супраць павелічэння фінансавання абароны Літвы.