Зяленскі: Расія ператварылася ў найбуйнейшую тэрарыстычную арганізацыю ў свеце

• 29.10.2025, 16:53

Крэмль мэтавана атакуе грамадзянскія аб’екты.

Сёння раніцай расійская армія нанесла ракетны ўдар па дзіцячай бальніцы ў Херсоне. Гэта свядомы расійскі ўдар менавіта па дзецях, пра гэта заявіў прэзідэнт Украіны Уладзімір Зяленскі.

«Яны (расіяне — рэд.) не маглі не ведаць, куды б’юць. Гэта свядомы расійскі ўдар менавіта па дзецях, менавіта па медыцынскім персанале, менавіта па базавых гарантыях жыцця ў грамадстве», — падкрэсліў кіраўнік Украіны.

Па словах прэзідэнта, бальніца атрымала значныя пашкоджанні, а сярод персаналу і дзяцей, якія знаходзіліся ў памяшканні, ёсць пацярпелыя.

«Наймалодшаму параненаму дзіцяці — восем гадоў. Быў паранены і сам хлопчык, і яго маці з братам. У момант гэтага ўдару ў бальніцы было каля ста чалавек», — расказаў Зяленскі.

Ён падкрэсліў, што Расія «нават не саромеецца таго, што разглядае такія аб’екты як мішэнь».

«Цяпер Расія — найбуйнейшая тэрарыстычная арганізацыя ў свеце, якая не проста зацягвае сваю тэрарыстычную вайну, але і стараецца зрабіць усё, каб не спрацавала ніводная магчымасць скончыць вайну», — заявіў прэзідэнт Украіны.

Зяленскі таксама адзначыў, што Масква свядома падрывае кожнае змястоўнае дыпламатычнае намаганне і спрабуе ствараць новыя крыніцы дэстабілізацыі ў Еўропе.

«Сёлета, калі так шмат амерыканскіх намаганняў, каб скончыць вайну, расіяне толькі павялічваюць нахабства і маштаб удараў. Расію не пераконвае нічога, акрамя ціску і сілы», — адзначыў ён.

Прэзідэнт вітаў увядзенне новых санкцый супраць расійскіх нафтавых кампаній, назваўшы іх «правільным крокам Амерыкі».

«Менавіта такія крокі патрэбныя і надалей, каб збіць расійскую нахабнасць, пазбавіць іх магчымасці зацягваць вайну і стварыць для Масквы рэальны матыў, каб гэтую вайну завяршыць. З тэрарыстамі трэба абыходзіцца толькі так, як яны заслугоўваюць — сілай і справядліва. Дзякуй усім, хто дапамагае Украіне», — сказаў Зяленскі.