Чарга легкавых аўтамабіляў на выезд у Польшчу вырасла амаль у тры разы

• 29.10.2025, 16:13

У пункце пропуску «Брэст» скупілася больш за тысячу легкавых аўтамабіляў і дзясяткі аўтобусаў.

Чарга легкавых аўтамабіляў на выезд з Беларусі ў Польшчу вырасла амаль у тры разы з-за закрыцця пунктаў пропуску на мяжы з Літвой. Паводле звестак Дзяржаўнага памежнага камітэта Беларусі, 29 кастрычніка па стане на 14:00 паводле беларускага часу ў электроннай чарзе ў пункце пропуску «Брэст» зарэгістравана 1155 легкавых аўтамабіляў. Выезду таксама чакаюць 35 аўтобусаў.

Удзень 25 кастрычніка, да інцыдэнтаў на літоўскай мяжы, у чарзе на выезд з Беларусі ў Польшчу было зарэгістравана каля 400 аўтамабіляў. Чаргі аўтобусаў у асобныя гадзіны ўвогуле не было, а ў моманты пікавай нагрузкі ў ёй стаяла некалькі аўтобусаў.