Кітай адварочваецца ад Расіі

• 29.10.2025, 14:56

Аб'ём гандлю падае.

За першыя дзевяць месяцаў бягучага года аб'ём расійска-кітайскага гандлю склаў $163,6 млрд — гэта на 9% менш, чым за аналагічны перыяд 2024 года. Пра гэта «РБК» распавёў пасол Расіі ў КНР Ігар Маргулаў, са спасылкай на даныя мытных службаў Кітая. У прыватнасці, пастаўкі кітайскіх аўтамабіляў на расійскі рынак у студзені—верасні скараціліся на 55%. Летась таваразварот паміж Кітаем і Расіяй усталяваў рэкорд, дасягнуўшы $244,8 млрд.

Па словах дыпламата, скарачэнне аб'ёмаў гандлю пачалося на фоне традыцыйнага зніжэння актыўнасці ў навагодні перыяд і з таго часу выйсці ў плюс не ўдалося. «Як бачыцца, у гэтай прасадкі ёсць шэраг аб'ектыўных прычын. Па-першае, за апошнія тры гады наш гандаль павялічыўся амаль удвая, на $100 млрд. Пасля такога бурнага росту адбываецца натуральная карэкціроўка», — заявіў Маргулаў.

Паступовае насычэнне расійскага рынку кітайскімі таварамі вядзе да таго, што аб'ём новых паставак змяншаецца, адзначыў пасол. Сярод іншых прычын змяншэння аб'ёмаў гандлю ён назваў падзенне сусветных цэн на сыравіну, якую Расія пастаўляе ў Кітай, ваганні валютных курсаў і заходнія санкцыі.

«Апошні прыклад — абвешчаныя напрыканцы мінулага тыдня санкцыі Вашынгтона ў дачыненні да найбуйнейшых расійскіх нафтавых кампаній і ўключэнне Бруселем у 19-ы пакет цэлага шэрагу кітайскіх прадпрыемстваў. Мы расцэньваем гэта як спробу Захаду ўзмацніць ціск на Маскву і Пекін, а заадно атрымаць сабе дадатковыя козыры ў гандлёвых перамовах з КНР», — сказаў Маргулаў.