Расійскія спецслужбы баяцца дзяцей

• 29.10.2025, 11:37

Моладзь — новы выклік для Крамля.

ФСБ Расіі падрыхтавала законапраект, які дазволіць яе супрацоўнікам удзельнічаць у працы камісій у справах непаўналетніх і перадаваць даныя пра так званую «праблемную моладзь» у дзяржаўныя базы і чорныя спісы, піша CEPA (пераклад — сайт Charter97.org).

Акрамя таго, створаная летам новая пенітэнцыярная структура ФСБ будзе задзейнічаная ў сістэме «прафілактыкі падлеткавай злачыннасці». Ведамства заяўляе, што гэтыя меры накіраваныя на процідзеянне спробам украінскіх спецслужбаў уцягваць расійскіх падлеткаў у дыверсіі.

З 2022 года пачасціліся выпадкі, калі непаўналетнія здзяйсняюць акты сабатажу — ад падпалаў чыгуначнага абсталявання да атак на ваенныя аб’екты. Так, у верасні 2024 года ФСБ затрымала двух 16-гадовых у Омску за падпал верталёта. Паводле даных следства, падлеткам паабяцалі $20 тысяч праз Telegram.

Паводле афіцыйнай статыстыкі, у 2023 годзе 308 падлеткаў прадсталі перад судом за «злачынствы супраць грамадскай бяспекі», з іх 48 — па артыкулах аб тэрарызме.

Новая ініцыятыва ФСБ нагадвае савецкую практыку «прафілактыкі» КДБ: гутаркі з «неблагонадзейнымі» грамадзянамі, якія суправаджаюцца пагрозамі сапсаванай кар’еры або турмы. Цяпер аналагічныя «размовы» могуць праходзіць у кабінетах камісій у справах непаўналетніх, а ў разе адмовы супрацоўнічаць — у ізалятарах ФСБ.

Паралельна ўлады ўзмацняюць жорсткасць пакарання. Дзярждума ўжо ўхваліла ў першым чытанні законапраект аб зніжэнні ўзросту крымінальнай адказнасці за дыверсію з 16 да 14 гадоў і аб скасаванні тэрміну даўнасці па такіх злачынствах.

Эксперты адзначаюць, што ФСБ фактычна вяртаецца да метадаў савецкіх спецслужбаў, крок за крокам адраджаючы практыкі сталінскай эпохі — аж да рэпрэсій супраць дзяцей.