У Крыме беспілотнікі Узброеных сілаў Украіны атакавалі дзве нафтабазы

• 29.10.2025, 9:59

Узніклі маштабныя пажары.

У часова акупаваным Сімферопалі ў Крыме ў сераду, 29 кастрычніка, у выніку начной атакі беспілотнікамі ўзнік маштабны пажар на нафтабазе, паведамляе тэлеграм-канал «Крымскі вецер».

Паводле даных мясцовых жыхароў, пашкоджанае прадпрыемства актыўна выкарыстоўваецца для пастаўкі паліва акупацыйным войскам.

Кіраўнік акупацыйнай «адміністрацыі» анексаванага Крыму Сяргей Аксёнаў пацвердзіў удар па «рэзервуары з гаруча-змазачнымі матэрыяламі». Паводле яго слоў, пацярпелых няма, на месцы траплення працуюць экстранныя службы.

Таксама «Крымскі вецер» паведамляе пра пажар на нафтабазе ў пасёлку Гвардзейскае. Ідзе пра прадпрыемства, якое належыць найбуйнейшай крымскай сетцы АЗС ATAN.

Уначы беспілотнікі таксама атакавалі шэраг расійскіх рэгіёнаў, уразіўшы нафтахімічны завод і два НПЗ у трох рэгіёнах. З-за пагрозы БПЛА 13 аэрапортаў прыпынялі працу.