У Кеніі разбіўся самалёт з турыстамі з розных краін

• 29.10.2025, 5:36

11 чалавек загінулі.

Раніцай 28 кастрычніка ў Кеніі разбіўся невялікі пасажырскі самалёт у прыбярэжным рэгіёне Квале падчас ліўню. Пра гэта паведаміла Associated Press.

На борце самалёта Cessna Caravan авіякампаніі Mombasa Air Safari знаходзіліся пераважна замежныя турысты: паводле даных авіякампаніі, восем вугорцаў, двое немцаў і кенійскі пілот — усе загінулі. Аднак Упраўленне грамадзянскай авіяцыі Кеніі (Kenya Civil Aviation Authority) раней паведамляла, што на борце было 12 чалавек.

Самалёт разбіўся ў гарастай, лясістай мясцовасці прыблізна за 40 км ад узлётна-пасадачнай паласы Дыяні, калі накіроўваўся ў Нацыянальны запаведнік Масаі-Мара.

Авіякампанія не пацвердзіла дакладны час вылету, адзначыўшы, што пілот не выходзіў на сувязь пасля ўзлёту, а дыспетчарская вежа спрабавала звязацца з ім цягам 30 хвілін. Паводле даных уладаў, катастрофа адбылася а 5:30, хоць міністр транспарту назваў час 8:35. Прычыны крушэння расследуюць адпаведныя службы.

Самалёт загарэўся, пакінуўшы на месцы абвугленыя абломкі, а мясцовыя чулі гучны выбух і знайшлі неапазнаныя чалавечыя рэшткі.

Нацыянальны запаведнік Масаі-Мара месціцца на захад ад узбярэжжа і з’яўляецца папулярным турыстычным напрамкам — два гадзіны прамым рэйсам ад Дыяні. Запаведнік вядомы штогадовай міграцыяй гну з Сэрэнгэці ў Танзаніі.

Паводле даных Міжнароднай арганізацыі грамадзянскай авіяцыі (ICAO), Кенія мае праблемы з бяспекай і расследаваннем авіяцыйных інцыдэнтаў і не дасягнула сярэднесусветнага ўзроўню.