СБУ прад'явіла абвінавачанне Кіркораву

• 28.10.2025, 20:31

З-за канцэртаў у акупаваным Крыме і «ДНР».

Народнаму артысту Расіі Філіпу Кіркораву завочна прад'явілі абвінавачанне ва Украіне з-за шоу ў акупаваным Крыме і «ДНР». Пра гэта паведамляе офіс украінскага генпракурора.

Служба бяспекі Украіны (СБУ) прад'явіла абвінавачанне Кіркораву завочна. Прычынай названа «неаднаразовае парушэнне парадку уезду на тэрыторыю Украіны».

Вядома, што Кіркораў рэгулярна ўдзельнічаў у канцэртах у акупаваных РФ рэгіёнах Украіны. У СБУ таксама нагадалі, што 18 сакавіка 2021 года спявак прыняў удзел у мітынгу-канцэрце на стадыёне «Лужнікі» ў Маскве, дзе падтрымаў акупацыю Крыму Расіяй.

У 2022 годзе, дадаюць украінскія праваахоўнікі, расійскі артыст наведаў ваенны шпіталь у Феадосіі, дзе падтрымаў расійскіх вайскоўцаў, а ў 2024 годзе спяваў у шпіталі для вайскоўцаў у Горлаўцы.

Філіп Кіркораў у санкцыйным спісе Кіева з 2022 года, яго пазбавілі ўкраінскіх дзяржаўных узнагарод.