Трамп прайшоў чарговы медагляд

• 28.10.2025, 10:31

Што паказала МРТ.

Прэзідэнт ЗША Дональд Трамп распавёў журналістам, што падчас нядаўняга абследавання ў вайсковым медыцынскім цэнтры Уолтэра Рыда ён прайшоў МРТ, вынікі якога, паводле яго слоў, былі «ідэальнымі». Пра гэта паведамляе CBS News.

Трамп прайшоў другое за год абследаванне на пачатку кастрычніка, праз шэсць месяцаў пасля папярэдняга, праведзенага ў красавіку — напярэдадні адлёту на Блізкі Усход. Пакуль невядома, ці было гэта планавым скрынінгам з прафілактычнай мэтай, ці яго прызначылі з-за пэўных медыцынскіх паказанняў.

На пытанне журналістаў, ці ўваходзіла МРТ у «пашыраную дыягностыку», пра якую раней паведамляў ягоны лекар, Трамп адказаў:

«Так, я прайшоў МРТ — усё ідэальна, так. Я прадставіў вам усе вынікі. Мы зрабілі МРТ — машына, поўнае абследаванне, і ўсё атрымалася ідэальна».