ЛУКОЙЛ вырашыў прадаць замежныя актывы з-за санкцый ЗША

• 27.10.2025, 23:13

Кампанія мае праекты на Балканах, на Блізкім Усходзе, у шэрагу краін ЕС і ў ЗША.

ЛУКОЙЛ намерваецца прадаць свае замежныя актывы пасля ўвядзення санкцый супраць кампаніі, паведаміла яе прэс-служба. 22 кастрычніка пра абмежаванні ў дачыненні да яе абвясцілі ЗША.

«Продаж актываў ажыццяўляецца ў адпаведнасці з ліцэнзіяй OFAC (Упраўленне па кантролі за замежнымі актывамі Мінфіна ЗША, якое ўвяло санкцыі. — Заўв.) на згортванне дзейнасці. Пры неабходнасці кампанія плануе падаць заяўку на падаўжэнне ліцэнзіі для забеспячэння бесперабойнай працы сваіх замежных актываў», — гаворыцца ў паведамленні.

Разгляд заявак ужо пачаўся, дадала кампанія.

OFAC адвяло месяц на згортванне аперацый з ЛУКОЙЛам — тэрмін мінае 21 лістапада. Тое самае датычыцца і «Раснафты», якая таксама трапіла пад санкцыі. Разам з галоўнымі кампаніямі абмежаванні закрануць і іх «дачок», дзе доля перавышае 50%.

ЛУКОЙЛ працуе ў наступных замежных краінах:

ЗША (сетка АЗС у штатах Нью-Ёрк, Нью-Джэрсі і Пенсільванія);

Бельгіі і Нідэрландах (таксама сетка АЗС, у Нідэрландах — доля ў 45% у нафтаперапрацоўчым заводзе Zeeland);

Аўстрыі і Фінляндыі (вытворчасць змазачных матэрыялаў LUKOIL Lubricants Europe);

Італіі (сетка АЗС);

Румыніі (НПЗ Petrotel-Lukoil, размешчаны ў горадзе Плоешці, за 55 км ад Бухарэста і з’яўляецца адным з найбуйнейшых нафтаперапрацоўчых заводаў Румыніі з гадавой магутнасцю перапрацоўкі 2,5 млн т);

Балгарыі (НПЗ «ЛУКОЙЛ Нефтохим Бургас» — найбольшае прадпрыемства па перапрацоўцы нафты на Балканскім паўвостраве, сетка АЗС);

Сербіі, Чарнагорыі, Паўночнай Македоніі, Малдове (сеткі АЗС);

Азербайджане (газакандэнсатнае радовішча Шах-Дэніз);

Казахстане (ЛУКОЙЛ, у прыватнасці, удзельнічае ў «Каспійскім трубаправодным кансорцыюме»);

Іраку (радовішча Заходняя Курна-2);

ААЭ (кансесія Ghasha) і інш.

Усяго ў кампаніі больш за 2,4 тыс. (на канец 2024-га) АЗС па-за межамі Расіі.