Танкерныя кампаніі пачалі адмаўляцца вазіць расійскую нафту

• 27.10.2025, 12:34

Санкцыі ЗША спрацавалі.

Грэцкія танкерныя кампаніі, якія, паводле ацэнак Інстытута Брукінгса, перавозяць трэць расійскай нафты, што ідзе на экспарт з заходніх партоў, сталі адмаўляцца працаваць з расійскімі нафтавікамі з-за санкцый адміністрацыі Дональда Трампа, піша The Moscow Times.

Удзел грэчаскіх суднаўладальнікаў, якія ў гэтым годзе кожны месяц вывозілі на экспарт ад 10 да 20 млн барэляў расійскай нафты, у канцы кастрычніка скараціўся да мінімуму, паведамляе Reuters са спасылкай на крыніцы, знаёмыя з сітуацыяй.

Паводле суразмоўцаў агенцтва, цяпер перавозкамі сорту Urals займаюцца ў асноўным танкеры ценявога флоту. Пры гэтым стаўкі фрахту прыкметна выраслі пасля ўзмацнення санкцыйнага рэжыму. Перавозка адной партыі Urals з Прыморска і Усць-Лугі ў індыйскія парты перавысіла $8 млн супраць $7 млн на пачатку месяца. Пры гэтым асобныя перавозчыкі паднялі цэны да $10 млн за рэйс, расказалі крыніцы Reuters.

Прэзідэнт ЗША Дональд Трамп мінулую сераду ўвёў блакіровачныя санкцыі супраць «Роснефти» і «Лукойла» — дзвюх найбуйнейшых нафтавых кампаній Расіі, на якія прыпадае палова здабычы ў краіне і кожны другі барэль экспарту. Адначасова Еўрасаюз у межах 19-га пакета санкцый уключыў у «чорныя спісы» яшчэ 117 танкераў ценявога флоту, павялічыўшы іх агульную колькасць да 558.

«Ценявы флот» перавозіць прыблізна палову расійскай нафты. Астатак возяць танкеры, якія альбо належаць уласнікам з краін G7, альбо застрахаваныя заходнімі краінамі, сведчаць падлікі фінскага цэнтра CREA.