Эканаміст: Лукашэнка бачыць, што бурбалка вось-вось лопне

• 24.10.2025, 19:35

Кіраўнік трапіў у цугцванг.

Напярэдадні Лукашэнка разышоўся нетыповай для яго тырадай у сувязі з аказаннем сацыяльнай дапамогі.

Пад раздачу трапілі і моладзь, якая «не можа зарабіць» і патрабуе стварэння нейкіх асаблівых умоваў, і сем’і з дзецьмі, якія нібыта не хочуць вырашаць свае праблемы самі.

Кіраўнік назваў і асноўныя прычыны, паводле якіх вымушаны адмаўляць у дапамозе гэтым катэгорыям грамадзянаў.

Эканаміст Аліса Рыжычэнка не згодная з азначанымі прычынамі і ўпэўненая, што справа ў безвыходным становішчы, у якім апынуўся Лукашэнка. Пра гэта яна распавяла «Філіну», як кіраўнік трапіў у цугцванг:

— Мы сапраўды апошнім часам бачым многія рэчы, якія не ўласцівыя звыклай палітыцы Лукашэнкі, чуем нетыповыя выказванні.

Справа ў тым, што ён, нарэшце, рэальна ўсвядоміў праблемы, з якімі сутыкнулася краіна. А менавіта — эканамічная ізаляцыя, немагчымасць Расіі далей падтрымліваць рэжым як фінансава, так і палітычна.

Напярэдадні да яго звярталіся па дапамогу чыгуначнікі, да гэтага яшчэ нехта, да яго пастаянна ідуць і просяць: дай грошы, дай субсідыі, бязпрацэнтныя або беззваротныя, дай танны крэдыт.

І гэта нарастае, як мыльная бурбалка. З 2019 года мы бачым павелічэнне грашовай масы больш чым у 2 разы. Колькасць аблігацый дзяржаўных органаў і іх ацэначны кошт у актывах Нацбанка выраслі больш чым у 10 разоў.

Гэта значыць, што Нацбанк проста друкуе грошы, выдае іх дзяржаўным органам ўзамен аблігацый. Але мы ўсё гэта ўжо бачылі ў 2011 годзе і памятаем, да чаго гэта прывяло.

Таму і цяпер існуюць велізарныя рызыкі высокага росту цэн, дэвальвацыі, у цэлым таго, што эканоміка больш не зможа спраўляцца.

Адметнасць цяперашняй сітуацыі ў тым, што праблемы ідуць па ўсіх фронтах. Калі раней магла ўзнікнуць дзесьці праблема, але за кошт іншых галін яе перакрывалі, то цяпер праблемы паўсюль.

Лукашэнка гэта бачыць, разумее, яму пра гэта яшчэ і нагадваюць з усіх бакоў, папярэджваюць, што вось-вось гэтая бурбалка лопне, адсюль і істэрыкі.