Расія рыхтуецца да стратаў з-за санкцый ЗША

• 23.10.2025, 21:04

Бюджэт пад ударам.

Расія чакае ўдару па дзяржаўным бюджэце з-за санкцый ЗША супраць дзвюх найбуйнейшых нафтаздабыўных кампаній краіны, уведзеных у сувязі з вайной ва Украіне.

Страты непазбежныя, хоць іх пакуль цяжка ацаніць, як паведаміла Bloomberg крыніца, блізкая да Крамля, пасля таго як адміністрацыя прэзідэнта ЗША Дональда Трампа уключыла ў чорны спіс кампаніі «Раснафта» і «Лукойл». Паводле суразмоўцы, Расія мае намер задзейнічаць сваю сетку нафтавых трэйдараў і «ценявы» флот танкераў, каб абмежаваць фінансавую шкоду.

Крыніца папрасіла не раскрываць сваё імя, бо гаворка ідзе пра адчувальныя пытанні.

З-за санкцый Трампа закупкі расійскай нафты ўжо прыпынілі найбуйнейшыя НПЗ Індыі, а таксама дзяржаўныя нафтавыя кампаніі Кітая. Гэтыя дзве краіны закупаюць 90% нафты, якую танкеры вывозяць на экспарт з расійскіх партоў.