Кардыёлагі назвалі тэст, які дапаможа пазбегнуць інфаркту

• 22.10.2025, 15:08

Вынікі тэсту могуць змяніць падыход да лячэння.

Каранарнае сканаванне кальцыю (CAC) набірае папулярнасць сярод кардыёлагаў як спосаб больш дакладна ацаніць рызыку сардэчна-сасудзістых захворванняў. Гэты кароткі і бязбольны КТ-тэст выяўляе наяўнасць кальцыевых адкладанняў і бляшак у артэрыях, што вядуць да сэрца, — ранніх прыкмет атэрасклерозу, піша The New York Times (пераклад — сайт Charter97.org).

Паводле слоў доктара Майкла Блаха з Універсітэта Джонса Хопкінса, выкарыстанне тэсту расце, але ягоны патэнцыял па-ранейшаму недаацэнены. Кошт сканавання вагаецца ад $100 да $300, аднак найчасцей пацыенты аплачваюць яго самастойна.

Вынікі тэсту могуць змяніць падыход да лячэння. Пацыенты з нулявым паказчыкам кальцыю маюць нізкую рызыку і звычайна не маюць патрэбы ў прыёме статынаў — прэпаратаў для зніжэння халестэрыну. Пры высокіх паказчыках (звыш 100) лекары часцей прызначаюць інтэнсіўную тэрапію.

Каранарнае сканаванне рэкамендуецца людзям 40–75 гадоў, якія не перанеслі інфаркт або інсульт і не прымаюць статыны. Тэст дапамагае адказаць на ключавое пытанне: ці варта пачынаць медыкаментознае лячэнне.

Нягледзячы на тое, што буйных клінічных выпрабаванняў, якія даказваюць зніжэнне смяротнасці дзякуючы сканаванню, пакуль няма, даследаванні паказваюць, што тэст спрыяе лепшай прыхільнасці да лячэння і зніжэнню ўзроўню халестэрыну.

Кардыёлагі лічаць, што візуалізацыя стану артэрый дапамагае пацыентам усвядоміць рызыкі і пачаць тэрапію. «Калі чалавек бачыць свае артэрыі з адкладаннямі кальцыю, ён успрымае пагрозу значна сур'ёзней», — адзначае доктар Аляксандр Жэўтлін.