З’явіліся новыя падрабязнасці ў «справе ліфцёра»

• 21.10.2025, 18:25

У міліцыю звярнуліся яшчэ больш за 20 жанчын.

Пасля публікацыі фатаграфій затрыманага Юрыя Дзям’янава, у міліцыю звярнуліся яшчэ больш за 20 жанчын, якія паведамілі, што таксама былі ахвярамі «магілёўскага ліфцёра».

Пра гэта БелТА распавёў прадстаўнік Следчага камітэта Канстанцін Глаўніцкі. Калі датычнасць падазраванага да гэтых эпізодаў будзе пацверджана, іх дададуць да крымінальнай справы.

На пачатку кастрычніка ў Магілёве сілавікі затрымалі 53-гадовага Юрыя Дзям’янава. Яго падазраюць у серыі жорсткіх згвалтаванняў і забойстваў. Злачынствы адбываліся ў 1996-1999 гадах на тэрыторыі Магілёўскай, Віцебскай і Мінскай абласцей.

Паводле слоў прадстаўніка Следчага камітэта Канстанціна Глаўніцкага, для расследавання злачынстваў мінулых гадоў у Беларусі была створана спецыяльная міжведамасная група з вопытных следчых, крыміналістаў, дактыласкапістаў і іншых экспертаў.

Менавіта яны пасля года працы і шэрагу паўторных экспертыз «сабралі поўны геном злачынцы з фрагментаў біалагічных слядоў» розных гадоў.

Паводле версіі следства, мужчына выследжваў сваіх ахвяр каля шматпавярховак, выбіраючы вонкава крохкіх дзяўчынак і жанчын. Калі ж тыя супраціўляліся — забіваў. Вядома пра восем забітых і двух, якія выжылі пасля замаху на забойства і згвалтаванне.

Плануецца, што рэзанансная справа «магілёўскага ліфцёра» будзе разглядацца адразу ў Вярхоўным судзе РБ — матэрыялы туды перададуць у канцы года.

На сёння мужчыну інкрымінуюць восем забойстваў, два замахі на забойства, чатыры напады на дзяўчынак і жанчын, а ацэньваць злачынствы з улікам часу будуць паводле Крымінальнага кодэкса БССР 1960 года. Яго артыкул 100 прадугледжвае ад 15 да 25 гадоў пазбаўлення волі, пажыццёвае зняволенне або смяротнае пакаранне.

Аднак у сувязі з тэрмінам даўнасці, кажуць юрысты, паводле дзеючага закона смяротнае пакаранне павінна быць заменена пазбаўленнем волі.