У Бразіліі сярэдні клас вызвалілі ад падаходнага падатку

• 2.10.2025, 22:29

За кошт багатых.

Бразільскія дэпутаты адобрылі ключавую ініцыятыву прэзідэнта Лулы па вызваленні сярэдняга класа ад падаходнага падатку. Яна будзе прафінансаваная за кошт павелічэння падатку для самых багатых — яго павялічаць у чатыры разы.

Аб гэтым 2 кастрычніка паведамляе тэлеканал BFMTV.

Ніжняя палата парламента Бразіліі адобрыла вызваленне ад падаходнага падатку для прадстаўнікоў сярэдняга класа, прапанаванае ўрадам прэзідэнта Луіса Інасіу Лулы да Сілвы. Крытыкі лічаць гэта рашэнне папулісцкім і памылковым.

Адобраны дэпутатамі тэкст пашырае мяжу вызвалення ад падатку для асоб, якія зарабляюць менш за 5 000 рэалаў у месяц (800 еўра). Цяпер ад падатку вызвалены толькі тыя, хто зарабляе менш за 3 000 рэалаў (480 еўра) у месяц.

Паводле звестак урада, каля 16 мільёнаў бразільцаў не будуць плаціць гэты падатак у 2026 годзе, калі прапанову канчаткова прымуць.

Каб кампенсаваць страты бюджэтных даходаў, праект прадугледжвае павышэнне падаткаў для асоб, якія зарабляюць больш за 50 000 рэалаў у месяц (7 995 еўра). Цяпер 140 000 чалавек у гэтай катэгорыі плацяць у сярэднім 2,5% падаходнага падатку. Павышэнне будзе паступовым і дасягне 10%.

Гэты законапраект, які цяпер павінен разгледзець Сенат, быў адзінагалосна адобраны. Апазіцыя, якую ўзначальвае партыя былога ультраправога прэзідэнта Жаіра Балсанару, таксама прагаласавала «за», нягледзячы на нязгоду з павышэннем падаткаў для самых багатых.

Гэта мера, папулярная сярод левага ядра прыхільнікаў Лулы, была негатыўна ўспрынята фінансавымі рынкамі, калі яе ўпершыню прадставілі летась, што нават выклікала гістарычнае абясцэньванне рэала.