Мігрантаў у Беларусі ўпершыню экзаменавалі па рускай мове

• 2.10.2025, 19:36

Ацэнкі засакрэцілі.

У Беларусі прайшоў першы экзамен на веданне рускай мовы для мігрантаў. Яго вынікі публікуе БелТА.

Гэта быў новы для нашай краіны досвед, Міністэрства адукацыі спецыяльна распрацавала тэставыя заданні для жыхароў замежжа.

У першы дзень, 30 верасня, выпрабаванне прайшлі 90 чалавек.

Работы замежнікаў па мове ўжо правераныя. Са заданнямі тэстаў нібыта справіўся 81 чалавек з 90, што прыраўноўваецца да 90%. Усе яны атрымалі станоўчы вынік.

Узровень ведаў мігрантаў невядомы — адзнак за экзамен у ведамстве не прывялі.

Для астатніх дзевяці чалавек нездавальняючы вынік выпрабавання не стане катастрофай — можна запісацца на наступную дату тэставання. Яно пройдзе 15 кастрычніка.

Тэставанне праводзяць ва ўсіх абласных ВНУ. Агульная колькасць месцаў для здачы, якую здольнае забяспечыць Міністэрства адукацыі, — па 500 месцаў двойчы на месяц. Беларускія ўлады плануюць праводзіць экзамен 15-га і ў канцы месяца.

Колькасць спроб здачы не абмежаваная.