Дэпутат Дзярждумы РФ: Эканоміка ў адчайным становішчы, сітуацыя жахлівая
- 19.10.2025, 22:09
Тое, што адбываецца, — прамое наступства вайны на знясіленне.
Унутры пуцінскага рэжыму ўсё гучней гучаць прызнанні аб крытычным стане эканомікі. Дэпутат Дзярждумы Міхаіл Дзялягін адкрыта заявіў, што ў краіне адбываецца імклівы абвал эканамічнай сістэмы, а афіцыйная статыстыка хавае маштабы крызісу. Гучную заяву ён зрабіў у інтэрв’ю Z-блогеру, перадае Dialog.UA.
«Эканоміка Расіі даведзена да адчайнага стану. Калі глядзець не на афіцыйныя рапарты, а на паведамленні бізнесменаў, дык гэта жудасна. Сельскагаспадарчае машынабудаванне за першае паўгоддзе ўпала на чвэрць… І гэта пры тым, што і мінулы год быў не самы спрыяльны. Вугільная галіна ў цяжкім становішчы. Увогуле, куды ні кінь, паўсюль складанасці і праблемы. І галоўная праблема — гэта ўдушэнне эканомікі завышанай ключавой стаўкай», — заявіў Дзялягін.
Словы дэпутата пацвярджаюць тое, пра што эканамісты даўно папярэджвалі: расійская эканоміка трашчыць па швах пад цяжарам санкцый, ваенных выдаткаў і неэфектыўных рашэнняў Крамля.
Сістэма задыхаецца ад празмерна высокай ключавой стаўкі, пры якой бізнес губляе магчымасць браць крэдыты і развівацца. Паводле слоў экспертаў, зніжэнне стаўкі ў бліжэйшы час немагчыма.
Экс-намеснік старшыні Цэнтрабанка і прафесар НДУ ВШЭ Алег В’югін адзначыў, што да канца года стаўка застанецца на ўзроўні 17%. Ён падкрэсліў, што ўлады вымушаныя пакрываць дэфіцыт бюджэту за кошт эмісіі новых рублёў, то бок фактычна «друкаваць грошы».
«Аптымізм адносна зніжэння стаўкі патроху рассейваецца, бо ў жніўні ўсе думалі, што 14–15 працэнтаў у канцы года дакладна будуць. На рынку быў вялікі аптымізм, усе скуплялі аблігацыі, асабліва доўгія АФЗ. А потым сітуацыя перавярнулася. Паваротным момантам стаў бюджэт: было пацверджана, што сёлета дэфіцыт будзе больш за 5 трыльёнаў рублёў і без манетарнага фінансавання тут не абыдзецца», — заявіў В’югін.
Ён таксама адзначыў, што працэс зніжэння інфляцыі спыніўся, а гэта значыць, што цэны зноў пачнуць расці. Эканоміка зайшла ў тупік, і інструменты для стабілізацыі сітуацыі ў Крамля практычна вычарпаныя.
Тое, што адбываецца, — прамое наступства вайны на знясіленне, у якую ўвязаўся дыктатар Уладзімір Пуцін. Шматгадовая мілітарызацыя бюджэту, каласальныя выдаткі на армію і акупацыю ўкраінскіх тэрыторый канчаткова разбураюць эканоміку Расіі.
Нават прадстаўнікі самой Дзярждумы цяпер вымушаныя прызнаваць, што сістэма развальваецца, а «афіцыйны аптымізм» больш не працуе.