Санкцыі працуюць: як ЗША і ЕС ужо пакаралі Расію

• 19.10.2025, 11:37

Разведка даведалася цікавыя дадзеныя.

ЗША і ЕС працягваюць узмацняць санкцыйны ціск на Расію. У акупантаў падае вытворчасць, даражэюць крэдыты, а санкцыі тым часам узмацняюцца.

Пра гэта паведамляе Служба знешняй разведкі Украіны.

Еўрапейскі саюз

Рада ЕС і Еўрапарламент папярэдне ўзгаднілі ўмовы праграмы развіцця абароннай прамысловасці EDIP, у якую на бліжэйшыя два гады закладзена фінансаванне ў памеры 1,5 млрд еўра, у тым ліку сродкі для прыцягнення ўкраінскага ВПК.

Еўрапейская камісія прапрацоўвае прапанову аб прыцягненні да рэпарацыйнай пазыкі для Украіны дадатковых 25 мільярдаў з прыватных рахункаў расіян у розных краінах.

Еўрапейскі банк рэканструкцыі і развіцця плануе павялічыць аб’ёмы аперацый ва Украіне да 2,5–3 млрд еўра ў год.

Кааліцыя магчымасцяў па размінаванні ў 2026 годзе плануе выдзеліць не менш як 165 млн еўра на забеспячэнне Украіны тэхнікай і абсталяваннем.

Фінляндыя далучылася да так званага «Талінскага механізму», які прадугледжвае меры па развіцці ўстойлівасці Украіны да кіберагроз.

Еўрапарламент

Камітэты Еўрапарламента па прамысловасці, навуковых даследаваннях і энергетыцы, а таксама па міжнародным гандлі адобрылі праекты аб забароне імпарту ў ЕС любога расійскага газу, уключна са СПГ, з 1 студзеня 2026 года.

Падрыхтоўка да абароны ЕС

На наступным тыдні Еўракамісія прадставіць кіраўніцтву ЕС праект плана падрыхтоўкі да магчымай вайны супраць Расіі, разлічаны на пяць гадоў.

ЗША

Паводле слоў віцэ-прэзідэнта ЗША Джэя Дзі Вэнса, прэзідэнт ЗША Дональд Трамп вядзе перамовы з Індыяй і Кітаем, каб скараціць закупкі расійскай нафты і паменшыць даходы РФ ад энергетычнага экспарту.

Лідар рэспубліканскай большасці ў Сенаце ЗША Джон Тун заявіў пра гатоўнасць падтрымаць законапраект, які прадугледжвае новыя гандлёвыя і фінансавыя абмежаванні ў дачыненні да Расіі.

Германія

Вышэйшы зямельны суд у Франкфурце-на-Майне прыняў рашэнне канфіскаваць на карысць Германіі каля €720 млн, якія належаць расійскаму банку, што трапіў пад еўрапейскія санкцыі ў 2022 годзе.

Эстонія

Урад Эстоніі прыняў рашэнне канчаткова спыніць рух па дарозе Вярска — Саатсе, частка якой праходзіць па тэрыторыі Пскоўскай вобласці.

Фінляндыя

Расійскія лыжнікі не змогуць выступіць на этапе Кубка свету ў Фінляндыі — для іх дзейнічае забарона на ўезд у краіну.

Эканамічная сітуацыя ў РФ

Найбуйнейшыя расійскія кампаніі могуць сутыкнуцца з фінансавымі цяжкасцямі, а магчымасці дзяржавы па падтрымцы іх праектаў істотна вычэрпаныя, заявіў міністр эканамічнага развіцця Максім Рэшэтнікаў.

Паступленні падатку на прыбытак арганізацый у рэгіянальныя бюджэты за студзень—жнівень скараціліся на 5,1 % год да года. Банкі РФ у верасні скарацілі выдачу іпатэкі на 8 % у параўнанні з папярэднім месяцам.

Доўг грамадзян па растэрміноўцы пры куплі жылля складае каля 1,5 трлн рублёў, і гэтая сума з пачатку года вырасла ў 1,5 раза.

Расіяне пачалі эканоміць на пакупках у крамах. Тэмпы росту выдаткаў знізіліся ўдвая — з 13–14 % у студзені да 6 % на канец ліпеня.

Колькасць новых праектаў на рынку жылля ў РФ у студзені—верасні зменшылася на 16 % у параўнанні з аналагічным перыядам мінулага года.

Найвышэйшы ўзровень рызыкі нярэалізаванасці кватэр у новабудоўлях у 2025 годзе зафіксаваны ў Краснадарскім краі, Самары і Краснаярску. Продажы новых пікапаў у Расіі па выніках дзевяці месяцаў 2025 года знізіліся на 25,7 %.

У 2025 годзе ў Расіі сярэдні кошт падрыхтоўкі аўтамабіля да зімы падскочыў як мінімум на 15 % у параўнанні з мінулым годам.

Біржавыя цэны на бензін АІ-95 павялічыліся на 0,19 %, на АІ-92 — на 0,12 %.

Расія скараціла пастаўкі за мяжу раслінных алеяў на 24 % адносна аналагічнага перыяду мінулага года. Замежнае піва падаражэла на 35 %, айчыннае — на 20 %.

Апытанне паказала, што жаданне адкрываць уласны бізнес у расіян упала да 14 % супраць 31 % у 2009 годзе.

Улады Санкт-Пецярбурга заднім чыслом адмянілі губернатарскую аднаразовую выплату ў 1,6 мільёна рублёў для добраахвотнікаў, якія ідуць на вайну супраць Украіны.

Каля 78 % кампаній у Краснадарскім краі заявілі, што адчуваюць складанасці з пошукам і найманнем персаналу. Найбольш складаная сітуацыя ў такіх сферах, як медыцына, будаўніцтва, продажы, сфера паслуг і лагістыка.

Аб’ём складскіх запасаў прамысловай прадукцыі РФ у грашовым выражэнні вырас на 35,9 % за год.