У Гомельскай вобласці знайшлі каўбасу «з будучыні»

• 18.10.2025, 19:03

Працу цэха прыпынілі.

Камітэт дзяржаўнага кантролю Гомельскай вобласці разам з санітарнай і ветэрынарнай службамі праверыў каўбасны цэх аднаго з прадпрыемстваў спажыўкааперацыі — выявілі шматлікія парушэнні.

Высветлілася, што ў цэху не праводзілі своечасова прыбіранне вытворчых памяшканняў і чыстку тэхналагічнага абсталявання. Сярод сыравіны знайшлі больш за 120 кг пратэрмінаванай прадукцыі: пярловую кашу, вараныя субпрадукты і комплексную харчовую дабаўку, паведамляюць «Гомельскія ведамасці».

Акрамя таго, на 12 кг шпіку стаяла дата вытворчасці з будучыні — 16 кастрычніка замест 14-га.

Пры гэтым прадпрыемства загадзя ведала пра праверку. Пасля візіту спецыялістаў санслужба забараніла выкарыстоўваць неякасную сыравіну, а працу цэха прыпынілі да навядзення парадку.