«Да Пуціна трэба прымяніць «сілу бізуна»»

• 18.10.2025, 16:32

Пра гэта заявіў прэзідэнт Фінляндыі.

Толькі прэзідэнт ЗША Дональд Трамп здольны прымусіць расійскага дыктатара Уладзіміра Пуціна пачаць сур'ёзныя перамовы аб міры.

Як паведамляе РБК-Украіна, пра гэта заявіў прэзідэнт Фінляндыі Аляксандр Стуб у інтэрв'ю для ВВС.

- Нам патрэбна не столькі сіла перніка, каб пераканаць Расію сесці за стол перамоваў, колькі сіла бізуна, якая прымусіць іх гэта зрабіць. Таму трэба прымусіць Расію сесці за стол перамоваў аб міры, і менавіта гэта спрабуе зрабіць прэзідэнт Трамп, - адзначыў Стуб.

На яго думку, Трамп прапанаваў Пуціну «пернік» у жніўні на саміце на Алясцы, але паразумення не знайшоў. Пасля гэтага ў Вашынгтоне пачалі больш схіляцца да «бізуна».

Прэзідэнт Фінляндыі лічыць, што нягледзячы на ўсе цяжкасці, з пачатку другога прэзідэнцкага тэрміну Трампа мірныя перамовы па Украіне прасунуліся далей, чым за папярэднія тры гады.

Варта нагадаць, што Стуб вядомы цеснымі асабістымі сувязямі з Дональдам Трампам. У жніўні ён стаў адзіным кіраўніком невялікай еўрапейскай дзяржавы, які ўзяў удзел у сустрэчы прэзідэнта Украіны Уладзіміра Зяленскага і групы еўрапейскіх лідараў з Трампам у Белым доме.

Больш за тое, Зяленскі напярэдадні сустрэчы з Трампам правёў працяглую размову з прэзідэнтам Фінляндыі Аляксандрам Стубам. Ён адзначыў, што каардынуе пазіцыі з прэзідэнтам Фінляндыі.

Нагадаем, што 17 кастрычніка Зяленскі сустрэўся ў Белым доме з кіраўніком ЗША Дональдам Трампам.