У расійскім Сцярлітамаку прагрымеў магутны выбух на ваенным заводзе

• 17.10.2025, 19:11

У горадзе пахне порахам.

У горадзе Сцярлітамаку ў Башкартастане на мясцовым хімзаводзе «Авангард» прагрымеў выбух. Пасля яго пачаўся моцны пажар.

Пра гэта паведамляе РБК-Украіна са спасылкай на Адміністрацыю Сцярлітамаку ў Telegram і Baza ў Telegram.

Мэрыя Сцярлітамаку заявіла, што выбух адбыўся ў адным з цэхаў завода «Авангард». На месцы ўжо працуюць «усе службы і ведамствы».

Пры гэтым звесткі пра загінулых і пацярпелых усё яшчэ ўдакладняюць.

У сваю чаргу Baza піша, што моцны выбух адбыўся ў трэцім цэху. Па непацверджаных звестках, у выніку інцыдэнту пацярпелі пяць чалавек. Трох дасталі з-пад завалаў. Адзін з будынкаў хімзавода моцна разбураны.

Пры гэтым на месца прыбыла вялікая колькасць «хуткіх», пошукі людзей пад заваламі працягваюцца.

Відавочцы кажуць, што ў горадзе пасля гэтага пахне порахам.

Варта адзначыць, што хімічны завод «Авангард» у Сцярлітамаку быў заснаваны ў 1943 годзе, у гады Другой сусветнай вайны.

Ён стаў адным з ключавых прадпрыемстваў па вытворчасці боепрыпасаў, уключаючы порахавыя зарады для рэактыўных сістэм залпавага агню «Кацюша».

У пасляваенныя гады «Авангард» працягнуў сваю дзейнасць, спецыялізуючыся на вытворчасці выбуховых рэчываў і боепрыпасаў.

Сёння «Авангард» займаецца расснаражэннем боепрыпасаў, утылізацыяй выбуховых рэчываў і вытворчасцю спецпрадукцыі па дзяржаўным абарончым заказе.