Аргенцінскі палітык памёр падчас тэледэбатаў у прамым эфіры

• 17.10.2025, 18:28

У мужчыны здарыўся сардэчны прыступ.

У Аргенціне падчас прамога эфіру памёр 66-гадовы палітык Эрнан Даміані, кандыдат у парламент правінцыі Місьёнес ад партыі Радыкальнага грамадзянскага саюза. Пра гэта паведаміла мясцовае выданне (Pagina12 https://www.pagina12.com.ar/866262-un-candidato-a-diputado-por-misiones-murio-tras-descompensar).

У мужчыны здарыўся сардэчны прыступ проста падчас тэледэбатаў, якія адбываліся ў студыі праграмы Dólar Blue, што транслявалася анлайн. Падчас эфіру Даміані выступаў з прамовай, калі раптам страціў прытомнасць. Кандыдата тэрмінова даставілі ў бальніцу Мадарыяга ў горадзе Пасадас, аднак лекары канстатавалі смерць — мужчына паступіў без прыкмет жыцця.

Даміані быў вядомы як уплывовы дзеяч аргенцінскага радыкальнага руху. Ён займаў дэпутацкае крэсла ў Кангрэсе краіны з 1997 па 2001 год і ўваходзіў у склад Заканадаўчага сходу Місьёнес у 1990-я. Таксама палітык неаднаразова ўзначальваў сваю партыю і працаваў у муніцыпальным савеце Пасадаса.

Губернатар Місьёнес Уга Пасалаква у сацсетцы X выказаў глыбокія спачуванні сям’і палітыка і адзначыў яго «доўгую службу, актыўную пазіцыю і адданасць ідэалам».