Расіяне ўстанавілі 4-гадовы рэкорд па куплі антыдэпрэсантаў
- 17.10.2025, 17:15
Попыт на прэпараты ад дэпрэсіі найвышэйшы ў пакалення «зумераў».
У верасні 2025 года грамадзяне Расіі набылі 1,94 млн упакоўак антыдэпрэсантаў на агульную суму 13,8 млрд рублёў — на 33% у грашовым выражэнні больш у параўнанні з мінулым годам, піша Mash са спасылкай на дадзеныя сістэмы «Честный знак». Гэта максімальны месячны паказчык за чатыры гады, адзначае канал. Попыт на прэпараты ад дэпрэсіі найвышэйшы ў пакалення «зумераў» (маладых людзей прыкладна ад 15 да 28 гадоў), расказалі фармацэўты і правізары, піша The Moscow Times.
Найбольш антыдэпрэсантаў у мінулым месяцы было прададзена ў Санкт-Пецярбургу (2230 упакоўак) і Маскве (2026). Далей ідуць Калінінградская вобласць (1401) і Карэлія (1398). Найнішы попыт на такія прэпараты зафіксаваны ў Тыве: 65 упакоўак за месяц. У Чачні гэты паказчык склаў 116 упакоўак, у Дагестане — 281.
У верасні RNC Pharma паведамляла, што са студзеня па ліпень 2025 года аптэкі продалі 12,9 млн упакоўак антыдэпрэсантаў на агульную суму 10,6 млрд руб. У грашовым выражэнні паказчык павялічыўся на 36% у параўнанні з аналагічным перыядам мінулага года.
Таксама за першае паўгоддзе вырас аб’ём продажаў анксыёлітыкаў — прэпаратаў, што зніжаюць трывожнасць і страх, вынікае з дадзеных RNC Pharma. Расіяне набылі больш за 9,3 млн упакоўак такіх лекаў — на 10% больш у параўнанні з папярэднім годам. У грашовым выражэнні прырост склаў 17% (за шэсць месяцаў грамадзяне выдаткавалі на анксыёлітыкі 4,6 млрд рублёў).
Да канца 2024 года каля 4 млн дарослых расіян стаялі на ўліку ў псіхіятараў, дзве траціны з іх — з трывожнымі і дэпрэсіўнымі засмучэннямі, паведамляла Міністэрства аховы здароўя. Як адзначаў урач‑псіхіятр, нарколаг і псіхатэрапеўт клінікі Rehab Family Сяргей Кузняцоў, як мінімум 25–30% насельніцтва краіны мае тую ці іншую форму трывожнага засмучэння і назіраецца тэндэнцыя да росту захворвальнасці. «Павялічваецца колькасць зваротаў пацыентаў да лекараў са скаргамі на трывогу, парушэнні начнога сну, кашмарныя сны, панічныя атакі, дэпрэсію», — адзначаў эксперт.