У Беларусі хочуць павысіць падаходны падатак да 40%

• 17.10.2025, 16:29

Лукашысты рыхтуюць новую шкалу падаходнага падатку.

У Беларусі разглядаюць варыянт, каб павысіць падаходны падатак да 40% для часткі насельніцтва. Гэта прадугледжана праектам змяненняў у Падатковы кодэкс. «Зеркало» тлумачыць, якія навацыі могуць увесці.

З 2024 года ў Беларусі ўвялі павышаны падатак для тых, хто зарабляе больш за 200 тысяч рублёў у год (у 2025-м парог паднялі да 220 тысяч). Такія людзі павінны плаціць падаходны падатак у памеры 25% з сумы перавышэння замест цяперашніх 13%. Ідзе гаворка пра даходы ад дывідэндаў, па працоўных дагаворах, а таксама па грамадзянска-прававых дагаворах. Фактычна можна казаць пра ўвядзенне ў Беларусі «падатку на багацце».

Што цяпер хочуць змяніць чыноўнікі

У 2026 годзе ў Беларусі можа з’явіцца трохступеньчатая прагрэсіўная шкала падаходнага падатку, паводле якой стаўка падатку расце разам з памерам даходу.

Але максімальныя стаўкі закрануць толькі невялікую колькасць падаткаплацельшчыкаў. Да такой высновы можна прыйсці з праекта Падатковага кодэкса на наступны год.

Цяпер прапануецца ў 2026 годзе павялічыць парог абкладання даходаў па стаўцы 25% з 220 000 да 350 000 рублёў. Пры гэтым з сумы, якая перавышае 600 000 рублёў, плануецца спаганяць падаходны падатак па стаўцы 40%.

Нагадаем, кіраўнік МПЗ Дзмітрый Кійко 16 кастрычніка паведаміў, што трэцяя ступень падаткаабкладання можа закрануць нібыта каля 1000 чалавек.