Еўракамісія вырашыла забраць у Расіі яшчэ 25 млрд еўра з замарожаных банкаўскіх рахункаў
- 17.10.2025, 14:37
Ёсць план выдаць гэтыя грошы Украіне.
Краіны Еўрапейскага саюза абмяркоўваюць план перадачы Украіне 140 млрд еўра замарожаных расійскіх валютных рэзерваў. Але гэта не ўсё, што можна ўзяць у агрэсара і накіраваць на дапамогу Украіне, вырашылі ў Еўракамісіі. Бо ў ЕС расійскія грошы ёсць яшчэ і на банкаўскіх рахунках.
Асноўны аб’ём замарожаных сродкаў, каля 185 млрд еўра, знаходзіцца ў бельгійскім дэпазітарыі Euroclear. З іх прыблізна 170 млрд еўра — грашовыя рэшткі, што ўтварыліся ў выніку пагашэння аблігацый, у якія былі ўкладзены расійскія сродкі; менавіта з гэтай сумы і мяркуецца выплаціць Кіеву рэпарацыйны крэдыт. Але ў краінах ЕС на банкаўскіх рахунках ляжыць яшчэ прыблізна 25 млрд еўра, і Еўракамісія хоча накіраваць іх на тыя ж мэты, піша Politico са спасылкай на дакумент, што апынуўся ў распараджэнні выдання і быў распаўсюджаны камісіяй напярэдадні пятнічнай сустрэчы паслоў краін блока.
«Варта разгледзець магчымасць распаўсюджання ініцыятывы па прадастаўленні рэпарацыйнага крэдыту на іншыя актывы, арыштаваныя ў ЕС, — гаворыцца ў дакуменце. — Юрыдычная магчымасць распаўсюджання на такія актывы падыходу, выкарыстанага для рэпарацыйнага крэдыту, дэталёва не ацэньвалася. Для прыняцця рашэння аб наступных кроках неабходна правесці такую ацэнку».
У дакуменце выкладзены «прынцыпы плана» па прадастаўленні Украіне такога крэдыту, які будзе абмяркоўвацца напярэдадні саміту лідараў ЕС на наступным тыдні. У Еўракамісіі хацелі б як мага хутчэй дасягнуць прынцыповай дамоўленасці, каб паспець прапрацаваць юрыдычныя дэталі і пачаць выплаты Украіне да другога квартала 2026 года.
Крэдыт мяркуецца выдаваць траншамі. Грошы пойдуць на «развіццё абаронна-тэхналагічнай і прамысловай базы Украіны і яе інтэграцыю ў еўрапейскую абаронную прамысловасць», а таксама ў бюджэт «пры выкананні адпаведных умоў», гаворыцца ў дакуменце Еўракамісіі. Германія і Францыя настойваюць, што значную частку сродкаў неабходна накіраваць на закуп Украінай еўрапейскіх узбраенняў. Гэта падтрымае ў тым ліку і абаронную прамысловасць ЕС.
Што да асноўнай часткі рэпарацыйнага крэдыту, то Бельгія настойвае на безумоўных гарантыях ЕС, якія абароняць Euroclear ад юрыдычных прэтэнзій з боку Расіі. Еўракамісія прапануе стварыць сістэму двухбаковых гарантый з боку краін ЕС, якія будуць ператвораны ў агульнасаюзныя, калі ў 2028 годзе пачне рэалізоўвацца новы сямігадовы бюджэт ЕС.