Цана расійскай нафты ўпершыню з вясны абвалілася ніжэй за $50 за барэль
- 17.10.2025, 14:17
Бюджэт Крамля атрымаў новую галаўную боль.
Расійскі бюджэт, які імкліва губляе нафтагазавыя даходы, атрымаў новую галаўную боль.
Кошт маркі Urals, галоўнай экспартнай маркі расійскіх нафтавікоў, упершыню з вясны апусціўся ніжэй за $50 за барэль. Як паведамляе Reuters са спасылкай на трэйдараў, у порце Прыморск на Балтыйскім моры каціроўкі ў сярэдзіне тыдня апускаліся да $47,4 за барэль.
У выніку кошт Urals упершыню апусціўся ніжэй за абноўлены цэнавы ліміт Еўрасаюза, усталяваны на ўзроўні $47,6.
Расійская нафта таннее следам за сусветнымі нафтавымі каціроўкамі, якія на гэтым тыдні абнавілі мінімумы з мая. Кошт маркі Brent за тры тыдні знізіўся на 15% і цяпер знаходзіцца крыху вышэй за $60.
Прычына — у перамір'і паміж Ізраілем і ХАМАС, якое знізіла напружанасць на Блізкім Усходзе і пагрозы для танкераў, што праходзяць па Суэцкім канале і Чырвоным моры, адзначае В'ярн Шыльдроп, аналітык SEB. Цяпер рынак сфакусаваны на лішку нафты, які ствараюць краіны АПЕК+, што нарошчваюць здабычу, указвае аналітык ANZ Дэніел Хайнс.
З красавіка па верасень картэль павялічыў пастаўкі на 2,2 млн барэляў у суткі, а ў наступным годзе можа дадаць на рынак яшчэ 1,2 млн барэляў штодзённай здабычы. У выніку лішак нафты ў свеце ў наступным годзе можа стаць рэкордным у гісторыі — 4 млн барэляў у суткі, паводле прагнозу Міжнароднага энергетычнага агенцтва.
Падзенне цэн на нафту суляе новыя праблемы федэральнаму бюджэту Расіі, які за студзень—верасень страціў 21% сыравінных даходаў. Першапачаткова праект бюджэту на 2025 год верстаўся з разліку, што барэль Urals будзе $70, аднак пазней планавы ўзровень панізілі да $58. Разам з гэтым быў радыкальна зменшаны план па нафтагазавых даходах: замест 10,9 трлн рублёў цяпер улады чакаюць толькі 8,6 трлн.
У бюджэт-2026 Мінфін заклаў Urals па $59 і захаванне сыравінных паступленняў на нізкім узроўні — 8,9 трлн рублёў, што на 20% ніжэй, чым у 2024 годзе. Пры рэкордных ваенных выдатках гэта суляе казне дэфіцыт на 3,8 трлн рублёў, вынікае з ацэнак Мінфіна.