Беларус купіў «у растэрміноўку» тэлефон за $500, аказалася — у крэдыт, і ўсё законна

• 17.10.2025, 14:15

Рыначная цана гаджэта — $118.

Махляры, якія выкарыстоўваюць юрыдычныя лазейкі, падмену паняццяў і дробны шрыфт, застаюцца адной з самых небяспечных катэгорый для пакупнікоў. Любая камунікацыя з імі — па тэлефоне або ў інтэрнэце — істотна павышае рызыку фінансавых страт, папярэдзілі ў Упраўленні аператыўных мерапрыемстваў інспекцыі МПЗ па Мінску.

Прыкладам такога выпадку стаў кліент, які набыў тэлефон «у растэрміноўку» за 1700 рублёў, хоць афіцыйная цана прылады складае 400 рублёў. Як высветлілася, насамрэч афармляўся банкаўскі крэдыт, пра які пакупнік не быў дасведчаны. Сайт прадаўца не прадастаўляў поўнай інфармацыі пра тавар, а продаж адбываўся выключна па тэлефоне. У выніку цана прылады аказалася амаль у чатыры разы вышэйшая за рыначную.

«Я расцэньваю гэта ўсё як махлярства. На сайце пазначана, што тэлефоны прадаюць у растэрміноўку. Гэта ілюзія, падман», — паскардзіўся мужчына.

У падатковай адзначылі, што метады махляроў разлічаныя на хуткасць і псіхалагічны ціск, не пакідаючы чалавеку часу для ўзважаных рашэнняў. У гэтым выпадку кліент асабіста і добраахвотна падпісаў усе дакументы, і фармальна адносіны кваліфікуюцца як грамадзянска-прававыя.

Пакупнікам рэкамендуюць старанна правяраць рэпутацыю прадаўца перад афармленнем замовы і падпісаннем дакументаў. А краму, дзе беларус купіў тэлефон у тры дарогі, паабяцалі праверыць.