Лідар перавароту на Мадагаскары склаў прысягу ў якасці прэзідэнта

• 17.10.2025, 12:35

Вайсковы захоп улады выклікаў асуджэнне з боку ААН і Афрыканскага саюза.

Палкоўнік Майкл Рандрыянірына у пятніцу склаў прысягу ў якасці новага прэзідэнта Мадагаскара пасля ваеннага перавароту, што адбыўся на гэтым тыдні на тле маладзёвых пратэстаў, піша DW (пераклад — сайт Charter97.org).

Вайсковы захоп улады выклікаў асуджэнне з боку ААН і Афрыканскага саюза, які прыпыніў сяброўства Мадагаскара. Адхілены ад улады прэзідэнт Андры Раджаэліна пакінуў краіну, заяўляючы, што яго жыццю пагражае небяспека. У аўторак парламент абвясціў яму імпічмент завочна неўзабаве пасля таго, як Рандрыянірына абвясціў пра пераход улады да вайскоўцаў.

Пратэсты супраць Раджаэліны працягваліся тры тыдні. Моладзь выступала супраць хранічных перабояў з электраэнергіяй і вадой, а таксама паглыблення беднасці. Пераломным момантам стаў мяцеж падраздзялення Рандрыянірыны — CAPSAT, якое перайшло на бок пратэстоўцаў.

Паводле дадзеных Сусветнага банка, каля 75% з 30 мільёнаў жыхароў Мадагаскара жывуць за мяжой беднасці, а электраэнергія даступная толькі 36% насельніцтва, прычым з рэгулярнымі адключэннямі.

Рандрыянірына заявіў, што краінай будзе кіраваць вайсковы савет разам з пераходным грамадзянскім урадам цягам бліжэйшых двух гадоў, пасля чаго адбудуцца выбары.

«Мадагаскар не абіраў ваенны рэжым. Урад застаецца грамадзянскім, а прэзідэнцкі савет складаецца з вайскоўцаў і грамадзянскіх асоб», — падкрэсліў ён.

Месцазнаходжанне Раджаэліны застаецца невядомым. СМІ паведамляюць, што 51-гадовы палітык быў вывезены французскім вайсковым самалётам на востраў Рэюньён, адкуль накіраваўся ў Дубай.