Гітанас Наўседа: Офісу Ціханоўскай трэба ацаніць, ці хочуць яны заставацца ў Літве ці выбраць іншае месца
- 17.10.2025, 12:28
Літоўскі прэзідэнт пракаментаваў зніжэнне фізічнай аховы Ціханоўскай.
Прэзідэнт Літвы Гітанас Наўседа пракаментаваў рашэнне аб зніжэнні ўзроўню аховы былой кандыдаткі ў прэзідэнты Беларусі Святланы Ціханоўскай і яе офіса. Ён прапанаваў ім «ацаніць, ці хочуць яны заставацца ў Літве ці выбраць іншае месца», перадае Delfi.
Наўседа заявіў, што ўзровень аховы Ціханоўскай быў зніжаны на падставе высноў кампетэнтных службаў. Таму, паводле яго слоў, сігналы Літвы, якія дасылаюцца міжнароднай супольнасці, не змяніліся.
— Сапраўды, усё застаецца так, як было, і спадарыня Ціханоўская застаецца госцяй нашай дзяржавы. Мы сапраўды даём прытулак людзям, якіх пераследуюць як апанентаў, — заявіў прэзідэнт краіны.
Паводле яго слоў, «што да спадарыні Ціханоўскай, нічога не змяняецца»:
— Я думаю, што сігналы, якія мы дасылаем міжнароднай супольнасці, застаюцца ранейшымі. А задача спадарыні Ціханоўскай і яе каманды — ацаніць, ці хочуць яны заставацца ў Літве ці выбраць іншае месца. У любым выпадку з нашага боку нічога не змяняецца, — дадаў Наўседа.
Ён таксама адказаў на крытыку, выказаную былым кіраўніком МЗС Габрыэлюсам Ландсбергісам адносна рашэння літоўскіх уладаў скараціць ахову Ціханоўскай, назваўшы экс-міністра «лідарам апазіцыі ў выгнанні».
— Ну, тое, што спадар Ландсбергіс апошнім часам пастаянна выказвае нейкія прапановы, заўвагі або занепакоенасць, — ну што ж, лідар апазіцыі ў выгнанні можа гэта рабіць. Успамінаючы, што калі ён быў у кіруючай кааліцыі і ўзнікала крытычная сітуацыя, ён пастаянна кудысьці знікаў, можа быць, нават не ў Літве, а на астравах быў, — то мяне трохі супакойвае, што апошнім часам ён так часта з’яўляецца ў публічнай прасторы. Гэта значыць, што ў Літве ўсё ў парадку і ніякай крытычнай сітуацыі няма, — заявіў Наўседа.
Нагадаем, з 1 кастрычніка ўрад Літвы знізіў узровень фізічнай аховы Святланы Ціханоўскай.
Ахова Ціханоўскай не адмяняецца поўнасцю, аднак узровень яе фізічнай абароны зніжаецца, і ахову перадаюць ад Службы аховы кіраўніцтва (Vadovybės apsaugos tarnyba) у Бюро крымінальнай паліцыі, якое забяспечвае абарону не як дзяржаўнай дзеячцы, а як асобе, якой аб’ектыўна можа пагражаць пэўная небяспека. Напрыклад, Бюро крымінальнай паліцыі забяспечвае ахову сведкаў і пацярпелых.
Паводле звестак крыніц літоўскага выдання LRT, ахова Ціханоўскай і спадарожныя выдаткі абыходзіліся дзяржаве прыкладна ў 1 млн еўра на год. У гэтую суму ўваходзілі кругласуткавая фізічная ахова ў Літве і за мяжой, аўтамабілі для суправаджэння, утрыманне месца пражывання, а таксама карыстанне VIP-тэрміналамі ў аэрапортах.