НАТА пасылае сігнал Пуціну

• Юрый Федарэнка
• 16.10.2025, 12:06

«Мяккая дыпламатыя» толькі павялічвае апетыт Расіі.

Генеральны сакратар НАТА Марк Руттэ зрабіў заяву, поўную дыпламатычнага туману, пра парушэнне Расіяй паветранай прасторы краін-членаў Альянсу: «Калі самалёт уяўляе пагрозу, мы маем паўнамоцтвы прыняць крайнія меры. Але калі самалёт не ўяўляе пагрозы, мы не будзем яго збіваць, а асцярожна выведзем за межы паветранай прасторы». Пры гэтым не зусім зразумела — па якіх крытэрыях будзе вызначацца ўзровень пагрозы?

Верагодна, з дыпламатычнай мовы на звычайную словы Руттэ можна перакласці так: Альянс не будзе збіваць расійскія самалёты, што парушаюць паветраную прастору, у выпадку, калі не зможа вызначыць ступень пагрозы, каб не справакаваць праціўніка. Такім чынам, кіраўніцтва НАТА пасылае драпежніку сігнал: нам не хапае рашучасці.

Марк Руттэ, нягледзячы на сваю пасаду, не столькі вайсковец, колькі дыпламат і палітык найвышэйшага ўзроўню. Складаецца ўражанне, што ён спрабуе «акалдоўваць» патэнцыйнага агрэсара складанымі моўнымі канструкцыямі. Але ці разумее ён, што Расія, як звер, адчувае найменшае праяўленне слабасці?

Пра нешта такое Марк Руттэ дакладна падумаў, бо ў ягонай прамове былі словы пра тое, што «мы значна мацнейшыя за расіян», і адмаўленне дэманстраваць сілу ўжо з’яўляецца «праяўленнем сілы». Выглядае паэтычна, але ў Крамлі сядзяць не паэты, а прыземленыя людаеды. Сярод генералаў НАТА дакладна ёсць людзі, якія гэта разумеюць.

У той час, калі генсак НАТА зрабіў заяву пра «незбіцце паветраных мэтаў», генералы Альянсу абмяркоўвалі правілы «збіцця». Паводле дадзеных брытанскага выдання The Telegraph, галоўнакамандуючы аб’яднанымі ўзброенымі сіламі НАТА ў Еўропе генерал Алексус Грынкевіч заклікаў калег стварыць «адзіную сістэму СПА і СРА», каб спрасціць хуткае і рашучае рэагаванне на магчымыя расійскія правакацыі.

Яго падтрымаў кіраўнік дэлегацыі Эстоніі ў Парламенцкай асамблеі НАТА Раймонд Кальюлайд. Прадстаўнік Эстоніі, у прыватнасці, сказаў: «Калі вы сцвярджаеце, што будзеце ўжываць сілу толькі ў выпадку прамой ваеннай пагрозы, вы фактычна кажаце, што пры пэўных умовах парушэнні нашай паветранай прасторы не будуць мець наступстваў. Гэта праява слабасці».

З гэтым сцверджаннем немагчыма не пагадзіцца. Такім чынам, па стане на дадзены момант бачым разыходжанне паміж пунктамі гледжання дыпламатаў і вайскоўцаў унутры НАТА. Ад таго, чыя пазіцыя пераможа, залежыць сама здольнасць НАТА выконваць свае абарончыя функцыі — функцыі ваеннага саюза, а не дыпламатычнага органа. Можна сказаць, што ад адэкватных адказаў на расійскую пагрозу залежыць сама будучыня НАТА.

Украінцы на ўласным вопыце адчулі, што «мяккая дыпламатыя» толькі ўзмацняе апетыт Расіі. Сёння Украіна дае максімальна адэкватны адказ на расійскую агрэсію і часткова выконвае функцыі Паўночнаатлантычнага альянсу: бо мы абараняем краіны Захаду ад уварвання, мы змагаемся за тое, каб прыгарады Варшавы, Рыгі, Вільнюса і Таліна не ператварыліся ў бліжэйшы час у адну вялікую Бучу. Мы ўжо даўно навучыліся разлічваць на ўласныя сілы. Але калі НАТА выявіць рашучасць, наша супрацьдзеянне рашызму стане значна больш эфектыўным. А калі не — то справімся ўласнымі сіламі. Слава Украіне!

Юрый Федарэнка, «Фэйсбук»