Эд Шыран упрыгожыў форму «Барселоны» сваёй музыкай

• 15.10.2025, 21:52

У гэтай форме каталонцы згуляюць Эль Класіка супраць «Рэала»

Эд Шыран знайшоў яскравы спосаб распавесці пра новы альбом — для гэтага музыкант размясціў яго назву на футболках гульцоў ФК «Барселона». У гэтай форме яны згуляюць Эль Класіка супраць «Рэала».

Назва альбома «Play» замяніла на футболках лагатып Spotify. Пры гэтым, паводле заявы кампаніі, Эд Шыран стаў першым мужчынам-сольным поп-выканаўцам, які стаў тварам ФК «Барселона».

Калекцыя ўключае 1899 футболак — іх колькасць адсылае да года заснавання клуба. Акрамя таго, былі прадстаўлены дызайн шаліка і худзі.

«Змена лагатыпа дэманструе, як супрацоўніцтва паміж ФК «Барселона» і Spotify паспяхова даследуе, наколькі далёка можна зайсці ў саюзе спорту і музыкі», — сказаў Манэль дэль Рыё, генеральны дырэктар клуба.

Пры гэтым крэатыў не абмежаваўся адзеннем. Spotify таксама дадаў спецыяльную версію плэйліста футбольнага клуба, складзеную Эдам Шыранам.

Новую форму надзене і жаночая каманда ФК «Барселона» ў матчы супраць ФК «Гранада» 19 кастрычніка. Футболкі таксама з'явяцца ў гульні eFootball.