Зяленскі заінтрыгаваў сустрэчай з Трампам

• 15.10.2025, 21:22

Кіраўнік Белага дома можа сапраўды наблізіць завяршэнне вайны.

Запланаваная на 17 кастрычніка сустрэча з прэзідэнтам ЗША Дональдам Трампам павінна стаць вельмі змястоўнай і можа сапраўды наблізіць завяршэнне вайны ва Украіне.

Пра гэта паведамляе Charter97.org са спасылкай на вячэрні зварот прэзідэнта Украіны Уладзіміра Зяленскага.

Паводле слоў Зяленскага, Украіна ўжо прапрацавала ваенныя і эканамічныя аспекты будучай сустрэчы з Трампам. А сама сустрэча абяцае быць даволі змястоўнай.

«Гэта сапраўды можа наблізіць завяршэнне вайны: менавіта Злучаныя Штаты маюць магчымасць такога глабальнага ўплыву, і мы робім усё, каб іншыя ў свеце былі па адзін бок з намі ў гэтай працы», — заінтрыгаваў Зяленскі.

Прэзідэнт дадаў, што цяпер у ЗША знаходзяцца прэм'ер-міністр Украіны Юлія Свірідэнка, кіраўнік Офіса прэзідэнта Андрэй Ермак, намеснік кіраўніка МЗС Украіны Сяргей Кысліца, пасол Украіны Вольга Сцяфанішына і іншыя чыноўнікі.

«Ужо ў Вашынгтоне пачалі сустрэчы на сваім узроўні, рыхтуюць аснову для размовы з лідарам Злучаных Штатаў, а таксама з амерыканскімі абароннымі кампаніямі, у прыватнасці вытворцамі сродкаў супрацьпаветранай абароны, а таксама з прадстаўнікамі энергетычных кампаній», — паведаміў Зяленскі.