Лондан забараніў увоз нафтапрадуктаў, вырабленых у трэціх краінах з расійскай нафты

• 15.10.2025, 20:48

Таксама ўведзены санкцыі ў дачыненні да «Раснафты» і «Лукойла».

У рамках новых санкцый супраць Расіі Вялікабрытанія адмовіцца ад імпарту нафтапрадуктаў, якія былі атрыманыя з расійскай нафты ў трэціх краінах, паведаміў урад краіны.

«Вялікабрытанія сёння абвясціла пра забарону імпарту нафтапрадуктаў, вырабленых у трэціх краінах з сырой нафты расійскага паходжання», — гаворыцца ў паведамленні.

Новыя санкцыйныя меры таксама прадугледжваюць:

абмежаванні ў дачыненні да кампаній «Лукойл» і «Раснафта»: замарозку актываў, санкцыі ў дачыненні да траставых паслуг і транспарту;

абмежаванні ў дачыненні да індыйскай кампаніі Nayara Energy (яна мае свой нафтаперапрацоўчы завод, порт і сетку АЗС), найбольшы акцыянер якой — «Раснафта»;

санкцыі супраць чатырох нафтавых тэрміналаў у Кітаі і 44 суднаў, якія Брытанія адносіць да расійскага «ценявога флоту»;

санкцыі супраць ЗПГ-галіны: васьмі танкераў для перавозкі гэтага паліва і кітайскага ЗПГ-тэрмінала;

санкцыі супраць Нацыянальнай сістэмы плацежных картак і шэрагу банкаў: Трансстройбанка, Примсоцбанка, ББР Банка і Солід Банка і інш.

«Мы пасылаем выразны сігнал: расійская нафта сыходзіць з рынку», — заявіла канцлер казначэйства Рэйчэл Рыўз.