Пакістан нанёс ракетны ўдар па Кабуле

• 15.10.2025, 16:56

Атаке таксама падвергліся пазіцыі «Талібана».

Пакістан здзейсніў ракетны абстрэл Кабула. Паводле крыніц Amaj News, прынамсі чатыры ракеты былі выпушчаныя па мэтах у сталічным раёне Таймані з выкарыстаннем ваенных самалётаў, піша The Moscow Times.

Samaa TV са спасылкай на добра інфармаваныя крыніцы ўдакладняе, што атаке таксама падвергліся пазіцыі «Талібана» ў раёне Спін-Болдак. Акрамя таго, армія Пакістана нанесла дакладныя ўдары па ключавых укрыццях талібаў у правінцыі Кандагар, у выніку чаго былі «паспяхова знішчаныя» 4-ы батальён і 6-я памежная брыгада. Паводле даных крыніц канала, страты талібаў склалі да 200 чалавек забітымі.

Эскалацыя наступіла пасля ранішняга сутыкнення на мяжы дзвюх краін 15 кастрычніка. Як паведамляла Reuters са спасылкай на прадстаўніка «Талібана», у выніку бою загінулі не менш як 12 мірных жыхароў, каля 100 чалавек атрымалі параненні.

«Талібан» заяўляе, што атаку пачалі пакістанскія сілы, а афганскія сілы ў адказ забілі «вялікую колькасць пакістанскіх салдат», захапілі іх пасты і ваенную тэхніку. Пакістанскія ўлады, у сваю чаргу, усклалі адказнасць за інцыдэнт на талібаў і паведамілі пра чатырох параненых мірных жыхароў на сваёй тэрыторыі.

Чарговы віток напружанасці паміж краінамі пачаўся 9 кастрычніка пасля нападу звязанага з талібамі пакістанскага руху «Тэхрык-е Талібан Пакістан» на вайсковы канвой у прыгранічнай акрузе Куррам. 10 кастрычніка Пакістан нанёс авіяўдар па адным з лідараў гэтай групоўкі ў Кабуле, а праз суткі талібы атакавалі пакістанскія памежныя пасты.