Эстонія запускае праграму навучання дарослых кіраванню дронамі

• 15.10.2025, 9:01

Міністэрства абароны краіны падпісала мемарандум з грамадскімі арганізацыямі.

Міністэрства абароны Эстоніі, Абарончая ліга і арганізацыя HK Unicorn Squad падпісалі мемарандум аб супрацоўніцтве, каб навучаць дарослых кіраванню дронамі.

Пра гэта гаворыцца ў заяве абароннага ведамства краіны.

Міністр абароны Ханна Пеўкур і генерал-маёр Ілмар Тамм, камандуючы Абарончай лігай Эстоніі, падпісалі мемарандум аб узаемаразуменні з HK Unicorn Squad MTÜ.

Мэтай супрацоўніцтва з'яўляецца папулярызацыя навучання палётам на дронах сярод насельніцтва. Пеўкур заявіў, што дроны стануць важнай складовай будучых ваенных дзеянняў.

«Нядаўна мы пачалі навучанне з выкарыстаннем дронаў у першых эстонскіх сярэдніх школах. Падпісаны мемарандум аб узаемаразуменні — яшчэ адзін крок наперад, бо мы пачнем навучаць дарослых. Гэта дасць грамадзянам магчымасць развіць свае навыкі ў сферы тэхналогій і унесці ўклад у комплексную нацыянальную абарону Эстоніі», — падкрэсліў ён.

Як адзначаецца, з мэтай павышэння дасведчанасці пра выкарыстанне беспілотных лятальных апаратаў Абарончая ліга і HK Unicorn Squad MTÜ пачнуць прапаноўваць базавую падрыхтоўку для тых, хто цікавіцца тэхналогіяй дронаў, у межах навучальнай праграмы «Kuri Kotkas».

«Эстонцы зацікаўленыя ў развіцці сваіх навыкаў працы з дронамі, але не ведаюць, з чаго пачаць. Kuri Kotkas — гэта навучальная праграма, распрацаваная перадусім для пачаткоўцаў», — сказаў Тааві Котка, заснавальнік HK Unicorn Squad.

Паводле яго слоў, дзякуючы практычным лётным практыкаванням ахвотныя змогуць авалодаць асновамі выкарыстання дронаў у ваенным кантэксце.