Трамп абвясціў пра пачатак другога этапу ўрэгулявання ў сектары Газы

• 14.10.2025, 21:25

Другая фаза прадугледжвае перадачу целаў загінулых закладнікаў.

Прэзідэнт ЗША Дональд Трамп пацвердзіў, што ХАМАС вярнуў Ізраілю ўсіх закладнікаў, якія засталіся жывымі, і абвясціў пра пачатак другой фазы мірнага ўрэгулявання ў сектары Газы, якая прадугледжвае ў тым ліку перадачу целаў загінулых закладнікаў. Пра гэта ён напісаў у сацыяльнай сетцы Truth Social.

«Усе 20 закладнікаў вярнуліся і адчуваюць сябе добра. Цяжкае бярэмя знята, але праца яшчэ не завершана. Целы загінулых не былі вярнутыя, хоць гэта было абяцана. Другі этап пачынаецца проста цяпер!!!» — заявіў Трамп.

8 кастрычніка Трамп абвясціў, што Ізраіль і ХАМАС па выніках перамоваў у Егіпце пагадзіліся на першую фазу прапанаванага ім мірнага плана. Праз два дні рэжым спынення агню ўступіў у сілу. Ізраіль адвёў войскі да буфернай зоны Газы, а палестынцы пачалі вяртацца дадому.