Сабаленка завершыць 2025 год першай ракеткай свету

• 14.10.2025, 19:59

Беларуска апярэджвае на 1 632 ачкі польку Ігу Святэк.

Беларуска Арына Сабаленка працягвае лідзіраваць у рэйтынгу Жаночай тэніснай асацыяцыі (WTA) пасля абнаўлення дадзеных 13 кастрычніка.

Па выніках 52 тыдняў беларуска набрала 10 400 ачкоў, апярэджвае на 1 632 ачкі польку Ігу Святэк, у якой 8 768 ачкоў. На трэцім месцы — пераможца нядаўняга турніру ў Ухані, амерыканка Кока Гаўф — 7 873.

Нагадаем, што ў Ухані Сабаленка саступіла ў паўфінале амерыканцы Джэсіцы Пэгуле. Сабаленка ўжо год узначальвае рэйтынг і дакладна застанецца на вяршыні да канца сезона. У статусе першай ракеткі яна пачне і 2026 год.

У 2025-м Арына згуляе яшчэ на выніковым турніры WTA, у ліку 8 лепшых тэнісістак. Матчы ў Эр-Рыядзе пачнуцца 1 лістапада.