Гісторык «раскрыў» асобу музы Вермеера з карціны «Дзяўчына з жамчужнай завушніцай»

• 13.10.2025, 22:29

На момант напісання карціны ў 1665 годзе ёй было каля 10 гадоў.

Асоба дзяўчынкі з карціны мастака Яна Вермеера «Дзяўчына з жамчужнай завушніцай» была «раскрытая» гісторыкам, піша Daily Mail.

Мастацтвазнавец Эндру Грэм-Дыксан заявіў, што музай нідэрландскага майстра, верагодна, была Магдалена ван Рюйвен — дачка яго галоўных мецэнатаў, Пітэра ван Рюйвена і Марыі дэ Кнуйт. Паводле слоў спецыяліста, на момант напісання карціны ў 1665 годзе Магдалене было каля 10 гадоў. Сям’я ван Рюйвен належала да рэманстрантаў — радыкальнай хрысціянскай секты, у якой жыццё было ўладкаванае паводле ўзору апосталаў і паслядоўніц Ісуса, уключаючы Марыю Магдалену. Гісторык звяртае ўвагу на тое, што дзяўчына на партрэце апранутая як паслядоўніца Хрыста, а яе поўны пачуццяў позірк можа быць звернуты да Збаўцы.

Грэм-Дыксан падмацоўвае сваю тэорыю гістарычным кантэкстам: Вермеер сам быў выхаваны ў сям’і рэманстрантаў і падзяляў іх перакананні. Марыя дэ Кнуйт была не толькі яго галоўнай заказчіцай і ўладальніцай большасці яго прац, але і пакінула яму значную суму ў сваім запавеце. Восенню 1667 года Магдалена, дасягнуўшы 12-гадовага ўзросту, павінна была «ўрочыста прысвяціць сябе Хрысту», што, на думку эксперта, робіць стварэнне такога партрэта сімвалічным.

Аднак не ўсе спецыялісты згодныя з такой трактоўкай. Аўтарка кнігі «Муза» Рут Мілінгтон адзначае, што тэорыя пра Магдалену не новая, і настойвае на тым, што зачараванне карціны — у яе таямніцы. Паводле яе меркавання, «Дзяўчына з жамчужнай завушніцай» — не партрэт канкрэтнага чалавека, а «троні» — выява ўяўнага, тыпізаванага персанажа.