Генсак НАТА высмеяў «зламаную» падводную лодку РФ паблізу Францыі

• 13.10.2025, 18:41

Марк Рютэ ўзгадаў раман «Паляванне на «Чырвоны Кастрычнік».

Генеральны сакратар НАТА Марк Рютэ высмеяў тэхнічны стан падводнага флоту РФ. У прыватнасці, ён назваў адну з расійскіх падводных лодак «зламанай» і пажартаваў, што яна «кульгае дадому».

Пра гэта паведамляе Reuters.

У заяве Рютэ гаворыцца пра расійскую дызельную субмарыну «Наварасійск», якую днямі заўважылі каля ўзбярэжжа Францыі. Расія заявіла, што лодка нібыта не мае няспраўнасцяў і паднялася на паверхню для выканання правілаў навігацыі.

Адначасова ўлады Нідэрландаў паведамілі, што «Наварасійск» бачылі на буксіры ў Паўночным моры, што ідзе ў разрэз з расійскай заявай.

Генсак НАТА падкрэсліў, што РФ фактычна страціла ваенна-марскую прысутнасць у Міжземным моры.

«Зараз, фактычна, амаль не засталося расійскай ваенна-марской прысутнасці ў Міжземным моры. Ёсць адзіночная і зламаная расійская падводная лодка, якая кульгае дадому з патрулявання», — заявіў Рютэ.

Ён таксама адзначыў, што цяперашняя сітуацыя хутчэй нагадвае камедыю, а не шпіёнскую драму, узгадаўшы раман Тома Клэнсі «Паляванне на «Чырвоны Кастрычнік».

«Сёння гэта больш падобна на паляванне на найбліжэйшага механіка», — сказаў Рютэ.