Дзясяткі мігрантаў спрабавалі пераправіцца з Беларусі ў Літву на лодках

• 13.10.2025, 17:37

На беразе іх чакалі літоўскія патрулі.

У нядзелю, 12 кастрычніка, група мігрантаў спрабавала трапіць з Беларусі ў Літву, пераплыўшы Нёман на надзіманых лодках, паведамляе Памежная служба Літвы.

Першая група з’явілася на беларускім беразе насупраць Друскінінкайскага раёна каля 5:30 раніцы. Яны прынеслі дзве надзіманыя лодкі і спусцілі іх на ваду. 18 чалавек на лодках накіраваліся ўніз па цячэнні ў бок Літвы. Заўважыўшы на літоўскім беразе памежныя патрулі, мігранты развернуліся і вярнуліся ў Беларусь. Яны выйшлі на бераг, выцягнулі абедзве лодкі і зніклі на тэрыторыі Беларусі.

У той жа дзень каля 19:00 яшчэ адна група мігрантаў, каля 16 чалавек, з’явілася на беларускім баку насупраць Лаздзійскага раёна. Частка з іх села ў надзіманую лодку, да якой была прывязаная вяроўка. У выпадку ўдалай высадкі першай групы тыя, хто застаўся на беларускім беразе, планавалі вярнуць лодку і пераправіцца праз Нёман. Як і ў першым выпадку, на літоўскім беразе мігрантаў чакалі літоўскія патрулі. Яны былі вымушаныя вярнуцца ў Беларусь.