Трамп абвясціў вайну ў Газе афіцыйна завершанай

• 13.10.2025, 12:09

Прэзідэнт ЗША заявіў, што спыненне агню «ставіць кропку» ў канфлікце.

Прэзідэнт ЗША Дональд Трамп адказаў станоўча, калі яго спыталі, ці можна лічыць вайну ў Газе афіцыйна завершанай, паведамляе CNN.

Калі Трамп праходзіў па будынку Кнэсэта ў Ерусаліме, журналіст спытаў яго, ці скончылася цяпер вайна «афіцыйна».

«Так», — адказаў Трамп, паўтарыўшы сваю пазіцыю і папярэднія каментары пра тое, што пагадненне аб спыненні агню, якое ён дапамог заключыць, азначае канчатковае спыненне канфлікту.

Раней Трамп пакінуў запіс у кнізе наведвальнікаў ізраільскага парламента.

«Для мяне гэта вялікі гонар — выдатны і цудоўны дзень. Новы пачатак», — напісаў прэзідэнт, а затым паставіў свой подпіс.

Трамп прыбыў у Ізраіль на фоне таго, як жыхары краіны сочаць за працэсам вызвалення закладнікаў з палону тэрарыстычнай групоўкі ХАМАС.

Нагадаем, раніцай 13 кастрычніка ХАМАС вызваліў і перадаў Чырвонаму Крыжу першых сем з дваццаці жывых закладнікаў.