НАТА пачала ядзерныя вучэнні Steadfast Noon

• 13.10.2025, 10:08

Альянс адпрацоўвае сцэнарыі стрымлівання Расіі.

З панядзелка, 13 кастрычніка, НАТА пачынае свае вучэнні па ядзерным стрымліванні Steadfast Noon 2025, паведамляе dpa.

Як адзначылі ў Камандаванні Аб’яднаных узброеных сіл НАТА ў Еўропе, на працягу наступных двух тыдняў у вучэннях возьмуць удзел каля 2000 вайскоўцаў.

У паветранай фазе вучэнняў будзе задзейнічана больш за 70 самалётаў. Сярод іх будуць і нямецкія знішчальнікі, здольныя транспартаваць амерыканскія ядзерныя бомбы, размешчаныя ў Еўропе.

Сёлета манеўры будуць праходзіць пераважна ў паветранай прасторы над Паўночным морам. У прыватнасці, у іх будуць актыўна задзейнічаны авіябаза Волкел у Нідэрландах, а таксама ваенныя базы ў бельгійскім Кляйн-Брогелі, брытанскім Лейкенхіце і дацкім Скрыдструпе.

Паводле даных НАТА, Бундэсвер прадастаўляе для вучэнняў тры самалёты Tornado, абсталяваныя для скідання амерыканскіх атамных бомбаў, а таксама чатыры самалёты Eurofighter.

Дэталі вучэнняў строга засакрэчаныя. НАТА не дае ніякай інфармацыі пра дакладны сцэнар вучэнняў.

У НАТА падкрэслілі, што Steadfast Noon — руціннае мерапрыемства і яно не з’яўляецца рэакцыяй на нядаўнія парушэнні расійскімі самалётамі паветранай прасторы або іншыя правакацыі.